U Wildberries znajšli tavary z «ekstremisckaj» simvolikaj

Padčas pravierki internet-kramy Wildberries supracoŭniki Ministerstva antymanapolnaha rehulavańnia i handlu vyjavili tavary z zabaronienaj i «ekstremisckaj» simvolikaj, paviedamiła pres-słužba viedamstva.

Skrynšot: mart.gov.by

Pavodle paviedamleńnia MARH, u asartymiencie markietpłejsa byli ideałahična nie adpaviednyja vokładki na biełaruskija pašparty, aŭtamabilnyja nalepki i inšyja pradmiety. Što dakładna tam było namalavana — nie ŭdakładniajecca, ale adznačajecca, što vyjavy majuć prykmiety «ekstrymisckaj atrybutyki».

Infarmacyju pra heta viedamstva pierasłała siłavikam.

U samim Wildberries paviedamili, što adreahavali na situacyju: sprečnyja tavary ŭžo prybranyja ź vitryny sajta, a taksama praviedzieny dadatkovy manitorynh na najaŭnaść zabaronienaj pradukcyi.

Placoŭka padkreśliła, što maje śpis tavaraŭ, zabaronienych da prodažu ŭ Biełarusi, i pradaŭcy, prymajučy ŭmovy supracoŭnictva, paćviardžajuć, što ich tavary adpaviadajuć zakanadaŭstvu. Ale adkaznaść za toje, što pradajecca, urešcie niasie sam pradaviec.

Kamientary da artykuła