Dźmitryj Łukašenka źnik ź infarmacyjnaj prastory

Siaredniaha syna Alaksandra Łukašenki nie było na cyrymonii 3 lipienia, nie dajechaŭ jon i da Aleksandryi. A pra jubilej Prezidenckaha spartyŭnaha kłuba, jaki śviatkavaŭsia dniami, na ŭsich telekanałach raskazvaŭ pamočnik Dźmitryja Łukašenki, a nie jon sam.

Dźmitryj Łukašenka

Za hady znachodžańnia va ŭładzie Alaksandra Łukašenki skłałasia tradycyja siamiejnaha ŭskładańnia kvietak u honar pieramohi ŭ Druhoj suśvietnaj vajnie. Kali heta nie jubilejny hod pieramohi, to cyrymonija adbyvajecca 9 maja. U jubilejnyja hady ŭ toj dzień adbyvajecca vajenny parad, a ŭračystaje ŭskładańnie kvietak adkładajecca na 3 lipienia. Zvyčajna na hetaj cyrymonii prysutničajuć usie syny Alaksandra Łukašenki.

Tak było, naprykład, 3 lipienia 2020 hoda.

Viktar, Dźmitryj i Kola Łukašenki. 3 lipienia 2020 hoda. Skryn videa: ont_by / YouTube

Taksama 9 maja 2021 hoda.

Alaksandr, Viktar, Dźmitryj i Kola Łukašenki. 9 maja 2021 hoda. Fota: BiełTA

Usie syny byli i praz hod — 9 maja 2022 hoda.

Kola (krajni źleva), Viktar i Dźmitryj Łukašenki. 9 maja 2022 hoda. Skryn videa: beltavideo / YouTube

Supravadžali jany chvoraha baćku, jaki nie zmoh vystupić z pramovaj, i 9 maja 2023 hoda.

Praŭda, u minułym hodzie na ŭskładańni kvietak 9 maja nie było Koli, a voś Viktar i Dźmitryj udzielničali ŭ cyrymonii. 

Dźmitryj (krajni źleva), Viktar i Alaksandr Łukašenki. 9 maja 2024 hoda. Skryn videa: beltavideo / YouTube

A voś u hetym hodzie tradycyju parušyŭ užo Dźmitryj. Kali na adsutnaść Koli ŭ minułym hodzie mała chto źviarnuŭ uvahu, to adsutnaść Dźmitryja azadačyła.

Alaksandr, Kola i Viktar Łukašenka na ŭračystym mitynhu z nahody 3 Lipienia 2025. Skrynšot ź videa BiełTA

Nie było Dźmitryja i na kancercie ŭ Aleksandryi 6 lipienia. Praŭda, prysutnaść na im nieabaviazkovaja — sioleta z synoŭ byŭ tolki Kola, letaś pobač z baćkam siadzieli Kola i Viktar. 

Kola i Alaksandr Łukašenki ŭ Aleksandryi

Chvaroba? Niamiłaść? Adkazu pakul niama. Adnak kali ž Dźmitryj Łukašenka źjaŭlaŭsia ŭ kadry apošni raz?

Druhi syn Alaksandra Łukašenki nikoli nie byŭ publičnaj asobaj, nie zajmaŭ nijakich čynoŭnickich pasad, kali takoj nie ličyć chlebnaje miesca staršyni Prezidenckaha spartyŭnaha kłuba. Z momantu zasnavańnia kłubu ŭ lipieni 2005 hoda im niaźmienna kiruje Dźmitryj.

21 maja hetaha hoda ŭ dziaržaŭnych ŚMI źjaviłasia infarmacyja, što Dźmitryja Łukašenku pieraabrali na pasadu staršyni arhanizacyi. Na ANT vyjšaŭ siužet ab hetaj padziei. U videa — frahmient vystupleńnia Dźmitryja.

Frahmient siužeta ANT. Dźmitryj Łukašenka siadzić pa centry. Skryn videa: ont_by / YouTube

Dźmitryj Łukašenka na svaich pieravybarach 21 maja. Fota: Sportclub.by

23 maja čarhovaja publičnaja cyrymonija ź jaho ŭdziełam — tut Dźmitryj uručaŭ pryzy junym valejbalistam.

Dźmitryj Łukašenka na cyrymonii ŭznaharodžvańnia 23 maja. Fota: Sportclub.by

Paśla hetaha ŭsie nastupnyja mierapryjemstvy prachodzili bieź Dźmitryja. Naturalna, što adkryvać spartyŭnyja placoŭki ŭ Babrujsku ci Vaŭkavysku ŭ kancy červienia hoda mahli i biez staršyni. 

Adnak Dźmitryj nidzie nie pakazaŭsia i 7 lipienia, kali adznačałasia 20-hodździe Prezidenckaha spartyŭnaha kłuba.

Na sajtach BiełTA i sb.by źjavilisia intervju ź im, adnak pa adkazach vidać, što heta zahadzia padrychtavanyja piśmovyja farmuloŭki.

U toj ža dzień na sajcie Prezidenckaha spartyŭnaha kłuba było raźmieščana vinšavańnie, padpisanaje Dźmitryjem. Ale znoŭ-taki — heta nijak nie śviedčyć pra toje, što jon sam pisaŭ hety zvarot.

A voś u śviatočnych telesiužetach abyšłosia bieź Dźmitryja. Na ŭsich troch asnoŭnych kanałach — BT, ANT i STB — vyšli repartažy pra Prezidencki spartyŭny kłub, dzie asnoŭnym śpikieram byŭ Pavieł Jahoraŭ. Heta pamočnik Dźmitryja Łukašenki.

Zaŭvažym, što pry hetym žonka Dźmitryja — Hanna Siałuk— nie źnikła, u adroźnieńnie ad muža.

Prateže Biełaruskaj miedyjakampanii, ź jakoj źviazana niaviestka Łukašenki, atrymała pieršuju premiju na sioletnim Słavianskim bazary. Siarod tych, chto vinšavaŭ śpiavačku Leru Biernatovič, była i Hanna Łukašenka (Siałuk).

Śpiavačka Lera Biernatovič (źleva) Hanna Siałuk. Fota: muzmedia.by / Instagram

Kamientary da artykuła