U Navahrudku padpisali damovu ab stvareńni Biełaruskaha muzieja Chałakostu

Padpisana pahadnieńnie ab stvareńni pieršaha muzieja Chałakostu ŭ Biełarusi. Biełaruski muziej Chałakostu i supracivu budzie raźmieščany ŭ Navahrudku, dzie padčas nacysckaj akupacyi byli zabityja 11 000 jaŭrejaŭ, piša «Radyjo Svaboda».

Navahrudak. Pamiatny znak na adnym ź miescaŭ rasstrełu jaŭrejaŭ z Navahrudskaha hieta. Archiŭnaje fota

Muziejnaja ŭstanova ŭ Navahrudku ŭšanuje pamiać 11 000 jaŭrejaŭ — achviar nacysckich raspraŭ, i 250 viaźniaŭ hieta, jakija prakapali sabie šlach da svabody.

Pahadnieńnie 10 lipienia 2025 hoda padpisali Iudziejskaje relihijnaje abjadnańnie ŭ Respublicy Biełaruś, Biełaruski fond miru i Navahrudski rajonny vykanaŭčy kamitet.

Siarhiej Čarkoŭski, staršynia Navahrudskaha rajvykankama, Artur Liŭšyc, staršynia Iudziejskaha relihijnaha abjadnańnia ŭ Biełarusi, Maksim Miśko, staršynia Biełaruskaha fondu miru paśla padpisańnia damovy ab muziei Chałakostu. Navahrudak, 10 lipienia 2025.

U Navahrudku adbyŭsia nadzvyčajny akt jaŭrejskaha supracivu. 26 vieraśnia 1943 hoda 250 viaźniaŭ ździejśnili najbolš maštabnyja ŭ akupavanaj nacystami Jeŭropie dakumientavanyja ŭcioki z hieta, tajemna vykapaŭšy za piać miesiacaŭ 250-mietrovy tunel.

Mnohija ŭciekačy dałučylisia da partyzanskaha atrada Tuve Bielskaha — adzinaha całkam jaŭrejskaha partyzanskaha atrada ŭ Biełarusi, jaki vioŭ ź lasnoha łahiera ŭ Nalibockaj puščy baraćbu z nacystami i vyratavaŭ bolš za 1200 jaŭrejaŭ.

Viadoma, što muziej buduć stvarać na terytoryi byłoha jaŭrejskaha hieta ŭ Navahrudku, pobač ź ciapierašnim Muziejem jaŭrejskaha supracivu ŭ histaryčnych budynkach. Pra čas adkryćcia pakul nie paviedamlajuć.

Kamientary da artykuła