U Hienštabie zrabili zajavu adnosna vučeńniaŭ «Zachad-2025»

Načalnik Hienštaba Biełarusi Pavieł Muraviejka u intervju «SB-Biełaruś siehodnia» vystupiŭ z tłumačeńniami adnosna sumiesnych vučeńniaŭ Biełarusi i Rasii «Zachad-2025», pryznačanych na sioletni vierasień.

Pavieł Muraviejka. Fota: sb.by

Pavieł Muraviejka adznačyŭ, što «dziela źnižeńnia napružanaści i paćviardžeńnia mirnych namieraŭ» było vyrašana pravieści asnoŭnyja epizody vučeńniaŭ udalečyni ad zachodnich i paŭdniovych miežaŭ krainy, kab nie pravakavać i nie vyklikać tryvožnaści ŭ susiedziaŭ.

Pry hetym varta adznačyć, što raniej ministr abarony Biełarusi Viktar Chrenin zajaŭlaŭ, što vučeńni «Zachad-2025», maŭlaŭ, z samaha pačatku pavodle ich zadumy źbiralisia pravodzić nie na zachodnich miežach, a ŭ hłybini terytoryi Biełarusi. Užo praź niekalki hadzin jaho faktyčna padčas vystupleńnia na ŭračystym pasiadžeńni pierad 3 lipienia abvierhnuŭ sam Łukašenka, zajaviŭšy, jak i ciapier Pavieł Muraviejka, mienavita pra pieranos.

Taksama, pavodle słoŭ Muraviejki, skaracili kolkaść vojskaŭ, jakija ŭdzielničajuć u vučeńniach, i zaprasili zamiežnych naziralnikaŭ, kab jany mahli nazirać za padziejami i pierakanacca ŭ prazrystaści pracesu.

Jon zhadaŭ, što padobnaja reakcyja na vučeńni ŭžo była ŭ minułym — naprykład, padčas «Zachad-2009», kali ŭ Jeŭropie hučali tryvožnyja zajavy pra nibyta pahrozu ahresii z boku Rasii, choć paśla vučeńniaŭ rasijskija i biełaruskija vojski viarnulisia na svaje bazy.

Pry hetym Muraviejka padkreśliŭ, što jakraz paśla tych vučeńniaŭ u Jeŭropie źjavilisia bataljonnyja taktyčnyja hrupy, i ź ciaham času ich kolkaść tolki raście. Ciapier takich hrup u Jeŭropie ŭžo 19, i 10 ź ich znachodziacca ŭ krainach, što miažujuć ź Biełaruśsiu.

Kamientary da artykuła