Biznesmien Juryj Hurski straciŭ kantrol nad kampanijaj Flo Health

Juryj Hurski, adzin z samych viadomych vienčurnych inviestaraŭ Biełarusi, straciŭ kantrol nad adnym z hałoŭnych svaich biznes-aktyvaŭ — kampanijaj Flo Health Group, raspracoŭščykam papularnaha dadatku dla žanočaha zdaroŭja Flo. Jak paviedamlaje vydańnie «Biełorusy i rynok», heta stała viadoma z hadavoha finansavaha dakładu brytanskaj častki kampanii — Flo Health UK.

Juryj Hurski. Fota: forbes.ru

Da žniŭnia 2024 hoda kantrol nad Flo Health naležaŭ kampanii Palta Group, zarehistravanaj na Kajmanavych astravach, asnoŭnym uładalnikam jakoj źjaŭlajecca Hurski.

Adnak u žniŭni Flo Health pryciahnuła kala 230 miljonaŭ dalaraŭ inviestycyj pad kiraŭnictvam fondu General Atlantic, i paśla ździełki dola Palta Group značna źmienšyłasia. Kampanija straciła bolšaść hałasoŭ i ŭžo nie źjaŭlajecca kančatkovym uładalnikam.

U 2024 hodzie vyručka Flo Health UK vyrasła na 51% i skłała 168,2 miljona dalaraŭ, a straty da padatkaabkładańnia skaracilisia na 12% (da 21,8 miljona). Najbujniejšym rynkam dla Flo stali ZŠA, dzie vyručka pavialičyłasia z 59,8 miljona da 86,8 miljona dalaraŭ. U top-5 taksama ŭvajšli: Vialikabrytanija (17,4 miljona), Aŭstralija (9,6 miljona), Kanada (7,4 miljona) i Hiermanija (7,2 miljona).

Darečy, dyrektaram Flo Health UK źjaŭlajecca Dźmitryj Hurski, brat Juryja.

U 2024 hodzie Juryj Hurski zajmaŭ 30-je miesca ŭ śpisie 100 najpaśpiachoviejšych biznesmienaŭ Biełarusi. Adnak ciapier jahonyja pazicyi mohuć asłabicca nie tolki praz stratu Flo Health, ale i praz asabistyja prablemy — jon udzielničaje ŭ składanym razvodzie z novaj žonkaj. Raniej, u 2020 hodzie, jaho pieršaja žonka, Iryna Hurskaja, była zabitaja ŭ svaim domie na Kipry padčas napadu. Złačynca, hramadzianin Litvy, byŭ zatrymany i asudžany na 22 hady.

Kamientary da artykuła