Piać mutnych momantaŭ u historyi pra danosčyka Bialucina i «śpiecapieracyju» KDB
U efiry ANT vyjšaŭ film «Harpun», u jakim KDB raskazvaje pra «śpiecapieracyju» pa vymańvańni aktyvista Paŭła Bialucina. Maŭlaŭ, čekisty śpiecyjalna dali «Kibierpartyzanam» uzłamać svoj sajt, papiarednie dadaŭšy tudy falšyvy danos ad imia Bialucina. U vyniku jaho ŭdałosia dyskredytavać, jon atrymaŭ zabaronu na pražyvańnie ŭ Litvie i ŭrešcie viarnuŭsia ŭ Biełaruś. Što nie tak z hetaj historyjaj?
Ujaŭny vybuch na Astravieckaj AES u fantazii ANT i KDB
1. Bieź Bialucina «drony» nie zapuściacca nijak?
Pieršaje łahičnaje pytańnie — a ŭ čym ža takaja kaštoŭnaść Paŭła Bialucina, kab dva hady sprabavać viarnuć jaho ŭ Biełaruś? Ź filma vynikaje, što jon datyčny da idei zapusku pa Astravieckaj AES dronaŭ. Heta virtualnaja fantazija staršyni KDB Ivana Cierciela, jaki ŭžo katory hod sprabuje skarmić jaje biełaruskamu hramadstvu.
Adnak u papiarednim filmie na hetu temu raskazvałasia, što stvaralnik hetych ujaŭnych dronaŭ — navukoviec i miedyk Aleh Daraškievič. Dyk što pieraškodzić jamu zapuścić drony bieź Bialucina?
Kali vieryć ANT i KDB, u Litvie sabrałasia hrupa biełaruskich radykałaŭ, hatovych litaralna na ŭsio — jany ŭžo navat kupili «kala 20 dronaŭ». Nijak nie tłumačycca, čamu adsutnaść adnaho z udzielnikaŭ pieraškodzić im realizavać svaje złaviesnyja płany.
2. «732 dni» — heta ad čaho da čaho?
U filmie z honaram adznačajecca, što śpiecapieracyja praciahvałasia 732 dni. Miarkujučy pa skrynšotach, jakija pakazvali ŭ filmie, apošni zvanok Bialucina adbyŭsia 24 lutaha 2025 hoda, apošniaja pierapiska ŭ telehramie — 1 sakavika 2025 hoda. Kadebisty pachvalilisia, što nibyta aryštavali Bialucina 5 maja 2025 hoda. Chutčej za ŭsio, jon apynuŭsia ŭ Biełarusi miž hetymi datami.
Kali adniać ad hetaj daty tyja samyja 732 dni, to pačatak śpiecapieracyi — luty-maj 2023 hoda.
Ale ŭ hetym ža filmie raskazvajecca, što «pastku» dla «Kibierpartyzanaŭ» zrabili istotna paźniej, u žniŭni 2023 hoda, bo ŭ bazie danosaŭ byli zvaroty ź vieraśnia 2014 hoda pa žnivień 2023 hoda.
Tady što takoje «732 dni»?
Dadamo, što sajt KDB tak nie zdoleli adnavić. Jon nie pracuje navat paśla skančeńnia hetaj śpiecapieracyi.
3. Kali Bialucin prachodziŭ pa spravie Aŭtuchoviča, to čamu jaho nie asudzili?
U filmie raskazvajecca, što jašče ŭ 2016 hodzie Bialucin uvajšoŭ u ruch «Razam» i staŭ paplečnikam Mikoły Aŭtuchoviča.
Aŭtuchovič — ciapier užo trojčy palitviazień — byŭ prychilnikam radykalnaha scenaryja i siłavoha adchileńnia Łukašenki. Jaho aryštavali 1 śniežnia 2020 hoda i prysudzili da 25 hadoŭ źniavoleńnia za padpały doma i aŭtamabila supracoŭnikaŭ milicyi.
«Bialucin prachodziŭ pa spravie Aŭtuchoviča. Paśla zatrymańnia Aŭtuchoviča jon i Artur Papok źbiehli za miažu», — havorycca ŭ filmie. Tak, Artur Papok zdoleŭ nielehalna pierajści miažu, ale pra datyčnaść Bialucina na sudzie nad Aŭtuchovičam nie ŭzhadvałasia.
Bolš za toje, praz hod paśla zatrymańnia Aŭtuchoviča, u lutym 2022 hoda, Bialucin byŭ aryštavany za «abrazu pradstaŭnika ŭłady». Kali b jon byŭ datyčnym da spravy Aŭtuchoviča, to jaho mahli b zaadno asudzić i pa joj.
Ale hetaha nie adbyłosia — praź niekalki miesiacaŭ Bialucin atrymaŭ chatniuju chimiju i vyjechaŭ ź Biełarusi.
Nie sudzili jaho i za pratesty — choć KDB dakazvaje, što jon aktyŭna ŭdzielničaŭ u ich.
4. Kali danos byŭ nasamreč fejkavym, to čamu Bialucin pra heta navat nie skazaŭ?
Kali ŭ bazie zvarotaŭ KDB znajšli zajavy, napisanyja siabrami «Narodnaj Hramady» Paŭłam Bialucinym i Volhaj Ciškievič, ich abvieścili danosčykami. Ale žurnalisty dali słova abaim — jak jany mohuć patłumačyć situacyju?
Ciškievič, jakaja pisała danos na Eduarda Palčysa, prydumała niaŭciamnuju lehiendu pra toje, što davała kampjutar «susiedu-jabaćku», jaki, maŭlaŭ, moh i napisać danosy. Bialucin ža pakinuŭ adnu šmatznačnuju, ale pa sutnaści biessensoŭnuju frazu: «Kali dać sapraŭdnuju infu, to ŭsio pieravierniecca».
Kali na jaho nasamreč uźviali paklop, čamu jon nie zajaviŭ pra heta? Pry čym nie skazać, kab Bialucin nie zmahaŭsia za mahčymaść zastacca ŭ Jeŭrasajuzie — jon sudziŭsia ź Litvoj, jakaja pryznała jaho pahrozaj nacyjanalnaj biaśpieki i anulavała status biežanca, jon pisaŭ biełarusam Partuhalii, Ispanii i Hiermanii z pytańniami, jak pasprabavać lehalizavacca ŭ ich krainach.
Volha Ciškievič paśla vypadkovaha vykryćcia viarnułasia ŭ Biełaruś i dała intervju prapahandystam. Padobna, jana była adklikana śpiecsłužbami, bo infarmacyi pra jaje zatrymańnie nie źjaŭlałasia.
5. Jak i čamu Bialucin viarnuŭsia ŭ Biełaruś?
Niahledziačy na toje, što Litva nie chacieła bačyć jaho na svajoj terytoryi, niama śviedčańniaŭ, kab Bialucina źbiralisia departavać u Biełaruś. Vyhladaje, što ŭ jaho była mahčymaść vyjechać tudy, kudy jon paličyć patrebnym. U śviecie chapaje krain, u jakich možna było b zastacca ŭ biaśpiecy — kali b Bialucin ličyŭ, što ŭ Biełarusi dla jaho nasamreč jość pahroza.
Kadebisty napuskajuć tumanu i nie kažuć, jak mienavita Bialucin apynuŭsia ŭ Biełarusi. Adnak vyhladaje, što jon vyrašyŭ viartacca sam. Na videa, źniatych kadebistami ŭ aeraporcie Stambuła (u filmie nie adznačajecca, što heta mienavita Turcyja, ale jaje možna paznać), a paśla i ŭ sałonie samalota «Biełavija», nie vidać nijakaj dramy, jon prosta lacić dadomu.
Bolš za toje, u rasparadžeńni kadebistaŭ akazaŭsia źmiest smartfona Bialucina ŭklučna ź jaho pierapiskami ŭ zakrytych čatach — aktyvist, jaki viedaje, što znachodzicca ŭ vyšuku, navat nie źbiraŭsia čyścić «kampramat» na siabie.