Načny avijaŭdar Rasii pa Ukrainie byŭ najbujniejšym z pačatku vajny
U noč na 29 červienia Rasija zapuściła 477 bieśpiłotnikaŭ i 60 rakiet pa ŭkrainskich haradach. Pad ataku trapili i zachodnija rehijony, addalenyja ad linii frontu.
Dom u Čarkasskaj vobłaści Ukrainy, paškodžany ŭ vyniku rasijskaha avijaŭdaru ŭ noč na 29 červienia. Fota: cherkaskaODA / Telegram
Pradstaŭnik Vajenna-pavietranych sił Ukrainy Juryj Ihnat, paćvierdziŭ Associated Press, što ataka stała «samym masiravanym avijaŭdaram» z pačatku poŭnamaštabnaj vajny ŭ lutym 2022 hoda, piša The Kyiv Independent.
VPS Ukrainy pozna ŭviečary 28 červienia papiaredzili, što Rasija zapuściła try bambaviki Tu-95 z vajskovaha aeradroma Aleńja ŭ Murmanskaj vobłaści. Paviedamlałasia, što ŭźlacieŭ rasijski MiH-31K — reaktyŭny samalot, zdolny nieści balistyčnyja rakiety «Kinžał». Vajenna-pavietranyja siły papiaredžvali, što kryłatyja rakiety nakiroŭvajucca ŭ niekalki rehijonaŭ, uklučajučy Ternopalskuju, Lvoŭskuju i Ivana-Frankoŭskuju vobłaści na zachadzie Ukrainy.
Paviedamlałasia pra šaściarych paciarpiełych u Čarkasskaj vobłaści.
Masiravanaja ataka adbyłasia na nastupny dzień paśla taho, jak prezident Rasii Uładzimir Pucin zajaviŭ žurnalistam, što Maskva hatovaja pravieści jašče adzin raŭnd mirnych pieramoŭ. Ukrainskaja i rasijskaja delehacyi ŭžo praviali dźvie pramyja sustrečy ŭ Stambule, ale abmierkavańni nie prynieśli asablivych vynikaŭ, akramia skaardynavanaha abmienu pałonnymi.