Śpiecsłužby šukajuć fatohrafaŭ na mitynh Cichanoŭskich praz skradzieny akaŭnt aryštavanaj redaktarki Vikipiedyi

Volha Sitnik, viadomaja pad niknejmam Chomiełka, dahetul za kratami pa «spravie vikipiedystaŭ».

Volha Sitnik. Fota ź jaje staronki «Ukantakcie»

Siońnia ŭ čatach biełaruskaj dyjaspary źjavilisia dziasiatki paviedamleńniaŭ, dzie nieviadomyja šukali tych, chto budzie fatahrafavać biełarusaŭ na mitynhu Śviatłany i Siarhieja Cichanoŭskich u Varšavie — asabliva prosiać fota tvaraŭ. I hatovyja ščodra zapłacić.

Taksama skidali fejkavy anons mitynhu — ź niapravilnaj dataj i miescam (na im pisałasia, što sustreča ŭ 20 hadzin kala pomnika Piłsudskamu — nasamreč ža mitynh budzie a 19-j kala pomnika Kapierniku).

Bolšaść akaŭntaŭ pustyja. Ale niekalki paviedamleńniaŭ pra pošuk fatohrafaŭ napisanyja z akaŭnta redaktarki biełaruskaj Vikipiedyi Volhi Sitnik, zachoplenaha siłavikami. Heta vielmi padobna na počyrk HUBAZiK — jany i raniej pisali z akaŭntaŭ zatrymanych.

Paviedamleńnie, napisanaje z akaŭnta Volhi ŭ adnym z telehram-čataŭ

Volha Sitnik uniesła sotni tysiač pravak u Vikipiedyju i stvaryła tysiačy artykułaŭ dla jaje. Taksama Volha administruje biełaruski raździeł.

Jaje zatrymali ŭ mai 2025 hoda. Sutnaść abvinavačańniaŭ nieviadomaja, ale padobna, što Sitnik prachodzić pa kryminalnaj spravie ź inšymi administratarami biełaruskaj Vikipiedyi, jakija ciapier za kratami.

Aproč hetaha, pa čatach šukajuć psieŭdavałancioraŭ, kab «dapamahać» na mitynhu. Imavierna, za ŭsimi hetymi dziejańniami stajać biełaruskija śpiecsłužby.

Kamientary da artykuła