«Jašče dzień i źbiraŭ by manatki». Zvolnili ŭ Niderłandach — na pošuk pracy 2,5 miesiacy. Historyja adnaho dedłajna
Lehalizacyja za miažoj časta pryviazana da pracy: niama novaha kantraktu — niama padstaŭ dla pražyvańnia ŭ krainie. Historyju pra toje, jak ajcišnik šukaŭ novuju pracu ŭ Niderłandach za dva za pałovaj miesiaca, pryvodzić devby.io.
Mužčyna pry pierajeździe ź Biełarusi ŭ Niderłandy praktyčna nie sprabavaŭ zachavać śpiecyjalnaść, a adrazu pazicyjanavaŭ siabie jak raspracoŭščyka («Ja viedaju prykładna nul prykładaŭ, kali dziela PM-a, jaki prychodzić biez kamandy ci zamoŭcy chtości zaparvaŭsia rašeńniem DNŽ, rełakacyjnymi bonusami i h. d. Vy na siabie prymierajcie: ciahnuć ź inšaj krainy čuvaka, jaki nie havoryć na tuziemnaj havorcy, zadoraha — navošta?).
Los raspracoŭščyka ŭ Niderłandach taksama akazaŭsia niaprostym, asabliva kali pryjšłosia terminova šukać novuju pracu. Ale ŭsio atrymałasia.
Čamu z PM viarnuŭsia ŭ raspracoŭku
— U pačatku 2021 hoda my z žonkaj vyrašyli, što čas źjazdžać: pierśpiektyvy ajcišački ŭ krainie, što imkliva zakryvałasia, bačylisia nie nadta pazityŭnymi. Ja pačynaŭ svaju karjeru jak prahramist, ale na toj momant apošnija 14 hadoŭ zajmaŭsia ŭ asnoŭnym mieniedžmientam. U toj ža čas za lubimymi movami sačyŭ, niešta kodziŭ dla siabie, epizadyčna braŭ u pracu niejkija drobnyja i niekrytyčnyja zadačy.
Mieniedžmient dla mianie byŭ nie stolki sposabam myśleńnia, kolki sposabam vyrašać bolš maštabnyja zadačy.
Tym nie mienš mieniedžaraŭ zvyčajna nie impartujuć pa adnamu, kali chtości i ŭvozić PM'a, to razam z kamandaj. Niama sensu płacić rełakacyjny pakiet i ładzić vizavyja pytańni «adzinočnamu» mieniedžaru z boku — u siabie ŭ krainie staić čarha achvotnych. A raspracoŭščyk — źvier patrebny.
Pačaŭ, naohuł, niaśpiešna šukać pracu «dzie-niebudź u Jeŭropie, kab ± chapała na žyćcio». Z hetaha punktu hledžańnia pryvabnyja pazicyi byli ŭ asnoŭnym u Hiermanii i Niderłandach. Polšča ŭ tyja časy zaŭvažna adstavała ad Biełarusi pa ajcišnych zarobkach — naturalna, možna było b znajści niešta dobraje, ale nie ŭ jakaści pieršaj pracy pa pryjeździe ŭ krainu.
Dziakujučy znajomamu rekrutaru patrapiłasia pazicyja prahramista ŭ trejdynhavaj kampanii ŭ Niderłandach. Ofier atrymaŭ u vieraśni 2021, startavali my ŭ kancy śniežnia.
Jak pierajechali
Pra pierajezd ja lublu raspaviadać siabram za šklankaj piva, sumna nie było: 3 dziaciej, 2 katy, 40 hadoŭ žyćcia, ścisnutyja ŭ niekalki valizak. Kavidnyja abmiežavańni — na maksimumie, atrymać hałandskija vizy ŭ Polščy, potym usiu hetuju bratvu transpartavać u Amsterdam (niekatorych — asobna i z chitrykami, bo zastalisia zakančvać škołu — a tut vajna i niezrazumieła, ci zastanucca adkrytymi miežy).
Zrešty, niama čaho tut šmat raskazvać: na hetym atrakcyjonie mnohija pakatalisia.
Jak pracavałasia
Pačatak pracy, kali ščyra, mieŭ efiekt chałodnaha dušu. Tak, ja viedaŭ S++ całkam upeŭniena, i z ałharytmami ŭ hałavie ŭsio było ŭ paradku, ale:
całkam novaja dla mianie śfiera, i całkam novaja «abviazka» — pačynajučy ad kiravańnia zaležnaściami, zakančvajučy kantejnieryzacyjaj i roznaha kštałtu DevOps-abviazkami.
Kali piliš chobi-prajekty, kab nie zabyć prahramavańnie, zvyčajna nie zamaročvaješsia ničym ź pieraličanaha. Nu i treba skazać, temp, jaki patrabujuć u padobnych kantorach, vielmi i vielmi badziory.
Doŭha ci koratka — praciahłaha siabroŭstva ŭ nas nie atrymałasia, praz 1,5 hady kantrakt mnie nie praciahnuli. A asablivaści hałandskaha DNŽ takija, što pry takim raskładzie na pošuk pracy ŭ mianie było 2,5 miesiacy, inakš — robim usim ručkaj i jedziem nazad. A ŭ nas — vahon sił, układzienych u adaptacyju siabie i dziaciej, i niejak vybudavany na novym miescy pobyt.
Nie toje kab Niderłandy paśpieli stać nam domam, ale sił na novy ryvok nie adčuvałasia. Plus finansavyja straty byli b niemałymi: tuju ž meblu pryjšłosia b raspradavać za biascenak ci naohuł kidać (kvatery tut zdajucca pieravažna «hołymi»).
Jak šukaŭ novuju pracu
Pačaŭsia terminovy pošuk pracy. Radaści dadavała toje, što vosieńniu 2022 pačalisia pieršyja masavyja zvalnieńni z bujnych kampanij i na rynku pracy boŭtałasia masa nie biazhłuzdaha narodu. Šukaŭ sistemna: vioŭ faktyčna nievialikuju CRM: z kim razmaŭlaŭ, jakija sumoŭi ci testy byli, nastupnyja kroki i h. d.
Niepryjemnym momantam było toje, što kandydataŭ usie šukali na «dakładnuju adpaviednaść», nichto nie byŭ zacikaŭleny ŭ «tałkovych chłopcach, zdolnych navučacca».
Niderłandy ŭ hetym sensie vielmi prosta možna padzialić na zony. Amsterdam — trejdynh, fintech. Ejndchovien i vakolicy — ASML i pracujučyja ź im plus IoT. Krychu asobna — banki. Astatniaje — katehoryja «inšaje», jana daloka nie pustaja, ale, skažam tak, niebahataja. Biełaruskaja ajcišačka była bolš raznastajnaj.
Ja pa svaim profili dobra padychodziŭ trejdaram (S++, ałharytmy), albo — ź vialikaj naciažkaj IoT-šnikam.
Z trejdarami vyjšła zaminka — u maim kantrakcie byŭ hadavy non-compete, i kampanii, u jakoj ja pracavaŭ, navat nie spatrebiłasia jaho farmalna prymianiać — u bolšaści miescaŭ, jak tolki daviedvalisia ab jaho najaŭnaści, znosiny pieraryvalisia.
U adnoj kantory ja prajšoŭ paru raŭndaŭ sumoŭjaŭ, paśla čaho jany vyrašyli ŭdakładnić, ci nie budzie prablem — i dastatkova akazałasia nievialikaj zaciažki ad «zychodnaj» kampanii, kab jany raschacieli sa mnoj razmaŭlać.
Takim čynam, sa 150 «padač» ja pryjšoŭ da dźviuch kampanij, dyjałoh ź jakimi mieŭ niejkuju pierśpiektyvu raźvićcia. U adnoj ź ich byŭ čysty mieniedžmient (i ŭ vyniku jany mianie nie paklikali), u druhoj — faktyčna startap: pradukt niejki čas ros vielmi pavolna, potym byŭ pradadzieny, i novaj kampanii treba było zrabić ź jaho niešta bolš pryvabnaje. Z ulikam trochi dzikavataha steka (Xamarin, Java, Angular, Mongo, VBA) jany šukali ŭniviersała — a ja, akramia S++, paśpieŭ pieraprabavać praktyčna ŭsio, čym byŭ bahaty naš aŭtsors u 2000-2010-ch.
Ach, tak, pikantnaja detal — kantrakt my padpisvali ŭ apošni mahčymy dzień: pa zakonie, kali b padača na abnaŭleńnie DNŽ tady nie adbyłasia, treba było b pasypać hałavu popiełam i źbirać manatki.
U žonki ŭ toj čas jašče nie było statusu Highly-skilled migrant, tak što ŭźjadnacca ź joj ja nie moh.
U tym, što mnie ŭdałosia ŭkłaścisia ŭ terminy, była dola ščaścia. Viedaju vypadki, kali mihranty nie paśpieli i pajechali dadomu (heta było jašče da 2020 hoda, tak što ŭ ich usio dobra: viarnulisia, ačuniali i rušyli žyć dalej).
«Daciskać» pracadaŭcu mnie nie pryjšłosia: praces najmu išoŭ u zvyčajnym dla ich tempie, ofier byŭ padpisany niekalkimi dniami raniej. Prosta potym pryjšłosia skazać: «Chłopcy, treba ŭsie papiery padpisać da 31 maja», nu i potym patelefanavać — nahadać.
Što kali b spaźniŭsia
Kali ja pravilna zrazumieŭ hałandskija zakony, to farmalna času dla vyjezdu ŭ nas by zusim nie było, ale faktyčna pracedura ŭsio roŭna zaniała b niejki čas.
Na vypadak niezaklučeńnia novaha kantrakta ŭ nas byŭ płan, padkazany mihracyjnym jurystam. My padali dziaciej na samastojnyja DNŽ (možna, kali tabie niama 18 i ty žyŭ bolš za hod u Niderłandach), potym my padalisia b na ŭźjadnańnie ź imi. Zapyt byŭ by asudžany na pravał, ale krychu času na pošuk pracy my b vyjhrali. Zrešty, ciešusia, što hetaj opcyjaj skarystacca nie pryjšłosia.
Byŭ jašče ŭ samych ahulnych rysach płan V: jakaja-niebudź kraina, jakaja prymaje biełarusaŭ na karotki termin bieź viz (kštałtu Hruzii), a tam — dumać i šukać. Ale na hetym manieŭry my b stracili tysiač 15-20.
Jak žyviecca ciapier
Vyniki: pracuju tut užo krychu bolš za dva hady na pazicyi faktyčna tymlida (aficyjna heta hučyć bolš pafasna, ale, kali ŭ kamandzie šeść čałaviek, sensu ŭ pafasie niamnoha). Pieršy kantrakt byŭ na hod, druhi — piermanient.
U Minsku paśla padatkaŭ ja atrymlivaŭ bolš, čym tut da, ale žyćcio pastupova stabilizujecca, źjaŭlajucca pierśpiektyvy i, dumaju, što jano taho varta.
Niazvykła, što dla taho, kab pražyć z tryma dziećmi i ipatekaj, treba abaviazkova dva dachody — kab adzin čałaviek moh tut utrymlivać siamju, jaho karjera pavinna być vielmi dobraj.
Adpaviedna, kali b žonka maja nie była takim ža ajcišnikam, zdolnym znajści pracu na mižnarodnym rynku pracy, treba było b šukać inšyja miescy dla pierajezdu.
Nu i hałoŭnaje — «Jak šukać pracu, kali ty ŭsio pra***raŭ, ale baišsia skazać pra heta dzieciam?»
- Pryjarytet pošuku pracy pierad usim astatnim. Darabić zadańnie pa pracy, ź jakoj sychodziš, možna i viečaram, kali treba stelefanavacca z rekrutaram ci pajści na sumoŭje — robiš.
- U samym pačatku pošuku — pišam na nie samyja padychodziačyja vakansii. Treba abkatać reziume, adpracavać praces, zvyknucca samomu. Pieršyja tydni — treniravalnyja.
- Dakładny trekinh usich uzajemadziejańniaŭ z patencyjnymi pracadaŭcami.
- Pakazać reziume ŭsim prafiesijanałam, chto zhodny jaho prakamientavać, vykarystoŭvać dla taho ž AI-tuły, usie parady prapuskać praź filtr.
- Testavaje? Viadoma, robim!
- Supravadžalnyja listy? Viadoma, pišam! Ščyra kažučy, napisać takuju kolkaść łuchty ja b pamior — ale božańka daŭ mnie ChatGPT.
- Rekamiendacyi? Naturalna.
- Patencyjny pracadaŭca choča sełf-intra-rolik z kolcam u nosie pad manholski rep? Nu, vy zrazumieli.
- Nie marnujem čas na samakapańnie i škadavańni. Nie ŭzhadaŭ niešta na sumoŭi? Nie rašyŭ zadačku? Nievialikaja praca nad pamyłkami, kab nie paŭtaryć u nastupny raz i pahnali. Paru razoŭ pamylaŭsia vielmi kryŭdnym čynam, z-za śpieški. Byvaje.
- Režym. Sport — ranicaj, praca i pošuk — udzień i viečaram, dastupnaje ŭ vašych krajach snatvornaje — na noč. Čałaviek, jaki nočču hladzić u stol, dakładna nie projdzie sumoŭje ranicaj. Parady pa daziroŭcy miascovych snatvornych srodkaŭ — u pryvatnym paradku.
- Dobraja siamja. Žonka ab niepraciahnieńni kantrakta viedała, naturalna, adrazu ž, starejšyja dzieci — praź miesiac. Ja da hetaha času ŭdziačny, što nivodnym słovam nichto ź ich mianie nie papraknuŭ.