4, 14 ci 114? U Kobrynie nie mohuć razabracca z numaram doma na fasadzie
U Kobrynie dabudoŭvajuć 10-paviarchovy panelny dom pa Respublikanskaj vulicy. Dom jašče nie skončany, ale na jaho tarcy ŭžo źjaviŭsia murał, jaki staŭ pryčynaj naśmiešak haradžan.
Murał na domie ŭ Kobrynie staŭ pryčynaj naśmiešak haradžan. Fota: kobrin_online
Paru dzion tamu ŭ miascovych pablikach źjavilisia fota niaskončanaha rośpisu na fasadzie novaha doma. Na tarcy doma paśpieli namalavać kampazicyju ŭ styli sintezu minimalizmu i ahrareniesansu: viertykalnyja pałosy, u jakija ŭpisany numar doma, kałośsie i karta krainy z podpisam «Biełaruś», jaki pa pamiery navat bolšy za nazvu vulicy — typovy tvor sučasnaj biudžetnaj architektury, kali nie chočacca mieć hłuchi tarec, ale i źmianiać typavy prajekt ci zaprašać prafiesijnaha mastaka doraha dla zabudoŭščyka.
Voś tolki aŭtary murała ŭ Kobrynie nie ŭličyli, što minimalistyčnaja čaćviorka — numar doma — upisanaja ŭ takija ž minimalistynyja viertykalnyja linii, budzie čytacca mnohimi jak 14. Heta i stała pieršapačatkova pryčynaj naśmiešak z novaha rośpisu.
Pieršapačatkovy vyhlad murała na domie №4. Fota: kobrin_online
Vyhlad murała paśla pieršaj sproby vypravić numar doma. Fota: kobrin_online
Uśviadomiŭšy svaju pamyłku, budaŭniki zafarbavali častku ramki vakoł numara, što zrabiła jaho jašče bolš padobnym da 14. U vyniku ramku vakoł numara prybrali zusim, ale i heta nie dapamahło — susiednija linii ŭsio roŭna stvarajuć u kobryncaŭ iluziju, što na domie napisana ci to 14, ci to 114.
Aktualny vyhlad murała. Fota: kobrin_online
Pakul pytańnie z numaram kančatkova nie vyrašana, ale žycharoŭ horada ciapier kudy bolš niepakoić inšy elemient murała — vialikaja karta Biełarusi, nivodnaja linija na jakoj navat blizka nie supadaje z realnymi miežami krainy i jaje abłaściej.
Karta Biełarusi na murale. Fota: kobrin_online
«Heta vyhladaje jak abhryzieny kavałak krainy. Navat vizualna bačna, što dziaržaŭnaja miaža prosta skažonaja da niemahčymaści. U nas vielmi pryhožaja kraina na karcie, a heta — ja nie viedaju…» — aburajucca kamientatary.
Nie mohuć kobryncy zrazumieć, i čyj Kobryn pa hetaj karcie:
«A Kobryn Ukrainie addali?»
«Nie, Małarycie».
«Zastałosia terytaryjalnyja sprečki pa karcie vyrašyć. Častku Litvy zabrali, častka Rasii taksama ŭ nas, Kobryn — addali Ukrainie. Ci mastak byŭ pjany, ci jon štości viedaje?» — iranizujuć inšyja.