Polšča źbirajecca praciahnuć dla biełarusaŭ sproščany paradak atrymańnia prajaznych dakumientaŭ

Polšča płanuje praciahnuć da 31 śniežnia 2025 hoda sproščanuju praceduru vydačy biełarusam prajaznoha dakumienta inšaziemca. Adpaviedny prajekt rasparadžeńnia Ministerstva ŭnutranych spraŭ i administracyi ŭžo ŭklučany ŭ bazu praŭradavaj zakanadaŭčaj inicyjatyvy, piša Most.

Fota: Most

Hety dakumient źjaŭlajecca časovaj zamienaj pašparta — jaho vydajuć inšaziemcam, kali ich pašpart stračany, praterminavany abo niama mahčymaści atrymać novy.

Sproščanaja pracedura adroźnivajecca ad zvyčajnaj tym, što:

• dakumient mohuć atrymać navat tyja biełarusy, jakija nikoli raniej nie mieli nijakaha prajaznoha dakumienta, u tym liku dzieci;
• nie patrabujecca dakazvać, što niama mahčymaści atrymać novy pašpart u biełaruskich uładaŭ;
• dla padačy zajavy dastatkova navat časovaha dazvołu na žycharstva, niezaležna ad jaho padstavy;
• biełarusy całkam vyzvalenyja ad apłaty za vydaču dakumienta.

U tłumačalnaj zapiscy adznačajecca, što hetaje rašeńnie palepšyć situacyju hramadzian Biełarusi, jakija znachodziacca ŭ Polščy i nie mohuć źviarnucca pa biełaruski pašpart z-za strachu pierad viartańniem na radzimu abo kantaktu ź biełaruskimi ŭładami.

Kolkaść takich zajaŭ ad biełarusaŭ niaspynna raście: kali ŭ 2020 hodzie ich było ŭsiaho 6, to ŭ 2023 hodzie ŭžo 1460, u 2024 — 3893, a tolki za pieršyja try z pałovaj miesiacy 2025 hoda — 1494.

Adpaviedna, raście i kolkaść vydadzienych prajaznych dakumientaŭ: u 2023 hodzie — 983, u 2024 — 3328, a z pačatku 2025 hoda — 1272.

Ułady Polščy miarkujuć, što praciah dziejańnia sproščanych umovaŭ adpaviadaje ahulnaj palitycy padtrymki biełarusaŭ, jakija apynulisia ŭ składanaj situacyi.

Kamientary da artykuła