Rasija naniesła rakietny ŭdar pa ŭkrainskim palihonie. Jość zabityja i paranienyja
U vyniku rasijskaha ŭdaru pa trenirovačnym palihonie Uzbrojenych sił Ukrainy zahinuli jak minimum troje čałaviek, jašče 11 atrymali ranieńni.
Pusk rakiety ź Iskandera. Ilustracyjnaje fota
Pra heta paviedamiła kamandavańnie Suchaputnych vojsk Ukrainy.
Pavodle infarmacyi pres-słužby, udar byŭ naniesieny ŭdzień 22 červienia pa palihonie adnoj ź miechanizavanych bryhad padčas praviadzieńnia zaniatkaŭ z asabovym składam.
«Dziakujučy svoječasova adpracavanym mieram biaśpieki pry atrymańni sihnału pavietranaj tryvohi ŭdałosia paźbiehnuć masavych strat asabovaha składu. Adnak, na žal, jość zahinułyja i paranienyja. Usie paciarpiełyja apieratyŭna atrymlivajuć usiu nieabchodnuju kvalifikavanuju dapamohu ŭ miedycynskich ustanovach», — havorycca ŭ paviedamleńni.
Dzie mienavita adbyŭsia rakietny ŭdar, vajennyja nie ŭdakładniajuć. U telehram-kanale «Nikołajevskij Vaniok», jaki źviazvajuć z administracyjaj Mikałajeŭskaj vobłaści Ukrainy, śćviardžajecca, što havorka idzie mienavita pra hety rehijon.
Pavodle papiarednich danych, udar byŭ naniesieny rakietaj «Iskander-M».
Kamandavańnie USU abviaściła pra stvareńnie śpiecyjalnaj kamisii, jakaja zojmiecca detalovym vyśviatleńniem abstavin incydentu.