«Ci možna Cichanoŭskaha pad safity i pytać pra płany, a potym pakazvać, jak jon rydaje?»
Ščyraja razmova Siarhieja Cichanoŭskaha z žurnalistami vyklikała krytyku ŭ niekatorych biełarusaŭ.
Siarhiej Cichanoŭski na svajoj pieršaj pres-kanfierencyi 22 červienia 2025 u Vilni raspłakaŭsia, kali raskazvaŭ, što dačka jaho nie paznała. Fota: Naša Niva
U sacyjalnych sietkach biełarusy dzielacca svaimi ŭražańniami ad pres-kanfierencyi Siarhieja Cichanoŭskaha i inšych vyzvalenych palitviaźniaŭ.
Televiadučaja i paetka Valaryna Kustava, jakaja źjechała ź Biełarusi ŭletku 2021 hoda z-za pahrozy pieraśledu pa abvinavačvańni ŭ supracy z «Biełsatam», a taksama za dapamohu represavanym, vykazałasia na svajoj staroncy ŭ fejsbuku na hetuju temu.
Kali «Naša Niva» cytavała dopis Kustavaj, jon byŭ adkrytym dla ŭsich. Ciapier aŭtarka schavała jaho, tamu pa jaje prośbie my prybrali z našaha sajta jaje mierkavańnie.
Valaryna Kustava. Fota z asabistaha archivu hieraini
Vykazałasia i žurnalistka Śviatłana «Niłła» Pažarava, napisaŭšy na svajoj staroncy ŭ fejsbuku:
«Nie treba było zaraz hetaj presuchi. Nie zaraz….». Dadaŭšy, što pres-kanfierencyja Siarhieja Cichanoŭskaha — «sumnaja karcinka našaj biełaruskaj žurnalistyki».
Na ŭdakładnialnaje pytańnie, što jaje zasmučaje, žančyna adkazała:
«Jany tolki ŭčora ź inšaha śvietu. Vielmi traŭmatyčnaha, u jakim praviali stolki hadoŭ. Ci možna takuju asobu vyvodzić pad safity i pytać pra płany, a potym pakazvać, jak jon rydaje? Ja dumaju, nie».
Na zaŭvahu, jak jašče pakazać śvietu, z čym zmahajecca Biełaruś, hetuju chroniku z kancłahieraŭ, bieź jakoj nie asensavać, što tam adbyvałasia, Niłła adkazała:
«A dla čaho? Zachodni śviet nie bačyŭ žachaŭ? Zaraz upiečatlicca? I kiniecca davić Łuku? Adkaz na ŭsie pytańni — nie. Heta ździek bieź vialikaha sensu. Va Ukrainie nichto nie ciahnie źniasilenych i zdezaryentavanych ludziej z rasiejskaha pałonu pad safity».
Śviatłana Niłła. Fota: svietka.p / Facebook