Tajamničy fond Łukašenki stvaryŭ strukturu ŭ Rasii
Tajamničy «Fond pieršaha», jaki źjaviŭsia z inicyjatyvy Alaksandra Łukašenki, stvaryŭ «dačku» ŭ Rasii. Tam arhanizacyja nazyvajecca «Krinica», a ŭznačalvaje jaje eks-načalnik upraŭleńnia asabistaj achovy palityka i ciapier jaho pamočnik pa ahulnych pytańniach, piša «Lusterka».
Zdymak maje ilustracyjny charaktar. Budynak ambasady Biełarusi ŭ Maskvie. Fota: tomin.by
Abiacali prazrystuju pracu, a stvaryli tajemnuju strukturu. Pra jaki fond havorka
U kastryčniku 2022 hoda ź inicyjatyvy Alaksandra Łukašenki byŭ zasnavany «Fond pieršaha». Sa słovaŭ palityka, jon musiŭ zamianić zakrytyja praz represii dabračynnyja arhanizacyi. «My zmožam akumulavać hrošy tych, chto nieabyjakavy. I z majho boku — harantyja taho, što hetyja hrošy raskradzienyja nie buduć», — kazaŭ palityk u kastryčniku 2023-ha — praz hod paśla stvareńnia fondu. A biełarusam abiacali poŭnuju prazrystaść pracy struktury — maŭlaŭ, «kožny achvotny moža pahladzieć, kudy skiravanyja jahonyja hrošy».
Adnak praz bolš čym dva hady struktura albo naohuł nie viadzie nijakaj dziejnaści, albo staranna jaje chavaje. Tak, u źviestkach adzinaha dziaržrehistra jurydyčnych asobaŭ i IP u fondu, jak vyśvietliła «Lusterka», pa-raniejšamu niama ni adrasu, ni kiraŭnika, ni rodu dziejnaści. Raniej taksama raskazvali, što hety prajekt padobny da miortvanarodžanaha albo fiktyŭnaha. Ciapier ža nam udałosia vyśvietlić, što tam usiaho adzin supracoŭnik, a finansavych spravazdač za minułyja hady struktura nie publikavała.
Što viadoma pra «dačku» fondu ŭ Rasii
Adzinaje źmianieńnie pa fondzie, jakoje fihuruje ŭ publičnaj płoskaści, — heta toje, što ŭ lutym 2025 hoda jon zasnavaŭ svaju «dačku» ŭ Rasii. Tam dabračynny fond nazvali«Krinica». Jaje dyrektaram pryznačyli Mikałaja Leanidaviča Łatyšonka — poŭnaha ciozku vajskoŭca i byłoha kiraŭnika ŭpraŭleńnia asabistaj achovy Łukašenki, a ciapier — pamočnika palityka.
Zarehistravanaja arhanizacyja ŭ Maskvie pa tym ža adrasie, pa jakim znachodzicca ambasada Biełarusi (vulica Marasiejka, 17/6).
Praz čatyry miesiacy z momantu zasnavańnia ŭ hetaj struktury taksama nie zafiksavana nijakaj dziejnaści. Prynamsi, publična.
Što viadoma pra dyrektara «dački» fondu ŭ Rasii
Biełarus Mikałaj Łatyšonak — vajskoviec, jaki advučyŭsia ŭ Razanskim vyšejšym pavietrana-desantnym vučyliščy. Z 1995 hoda ŭvachodziŭ u słužbu biaśpieki Alaksandra Łukašenki. A ŭ 2003-m uznačaliŭ upraŭleńnie asabistaj achovy palityka.
Z 2018 hoda Łukašenka pryznačyŭ jaho svaim pamočnikam pa ahulnych pytańniach.
Mienavita Łatyšonak 30 žniŭnia 2020 hoda paśla zaviaršeńnia niadzielnaha maršu vyjšaŭ z Pałaca niezaležnaści da ludziej, jakija tam zastalisia. Jak pisaŭ Tut.by, pra pratestoŭcaŭ Łatyšonak tady skazaŭ nastupnaje:
— Nu jakaja vas bolšaść?! Vy našuju krainu zahaniajecie (žest, jaki pakazvaje «ŭniz»). Jon (Łukašenka) nie prajhraŭ adnaznačna. Bolšaść na baku prezidenta. Voś praz vašyja ŭsie akcyi — pahladzicie na kurs dalara (jon ros na toj momant bolš za 10 dzion). U vas jość vybar, tut niama zasłony.
— Vy admaŭlajecie katavańni na Akreścina? — spytali tady Łatyšonka.
— Pačakajcie. Usio, što pakazana ŭ ŚMI, — heta pamnožana na 100. Jak minimum, — adkazaŭ jon.
— Piać amapaŭcaŭ na adnaho čałavieka — heta narmalna? — spytali ŭ toj ža razmovie hramadzianie ŭ adkaz na jahonuju zajavu, što siłaviki dziejničali pravamierna.
— Narmalna, — adkazaŭ Łatyšonak.
Tady ž jon abvinavaciŭ ludziej u skačkach kursu dalara: Praz vašyja ŭsie akcyi pahladzicie na kurs dalara. Da čaho vy šturchajecie [ekanomiku]». Niezadavolenym situacyjaj u krainie pamočnik Łukašenki ŭ toj razmovie paraiŭ źjechać za miažu.