Jakija banki hatovy ŭziać u vas nie samyja idealnyja kupiury
Kali ŭ vašaj skarboncy znajšłosia niekalki banknot z paškodžańniami, nie chvalujciesia. Jość banki, jakija ich prymuć, časam i zusim biez kamisii. Praŭda, daviadziecca pabiehać i pašukać patrebny abmieńnik. «Točka» pahladzieła, u jakich bankach jość šaniec zdać zamiežnuju valutu navat z zaŭvažnymi niedachopami.
Usie banki ŭ krainie i Asacyjacyja biełaruskich bankaŭ padpisali pamiž saboj pahadnieńnie, dzie nazvany adzinyja krytery dla vyznačeńnia płaciežazdolnaści banknot (dla zamiežnaj valuty, za vyklučeńniem rasijskaj).
Tak, pryniać i vydać mohuć tyja kupiury, na jakich jość niaznačnyja paškodžańni:
-
zabrudžvańni z-za naturalnaha znosu;
-
paciortaści (ściortaja farba, linii pierahinaŭ);
-
nie bolš za piać nadryvaŭ / nadrezaŭ daŭžynioj nie bolš za 3 mm abo adzin nadryŭ / nadrez daŭžynioj nie bolš za 10 mm, u tym liku zaklejenyja prazrystaj lipkaj stužkaj;
-
majuć prakoły (nie bolš za čatyry) dyjamietram nie bolš za 1 mm kožny;
-
nie bolš za try vizualna bačnyja vyjavy / nadpisy, pamieram kožnaha nie bolšyja za pamier kvadrata sa staranoj 10 mm, abo adzin malunak / nadpis, pamier jakoha nie pieravyšaje kvadrat sa staranoj 20 mm;
-
nie bolš za adnu vizualna bačnuju plamu nie bolš za kvadrat sa staranoj 10 mm i nie bolš za try vizualna bačnyja plamy, pamier kožnaj ź jakich nie pieravyšaje kvadrat sa staranoj 5 mm;
-
źmiena tonu banknotnaj papiery va ŭltrafijaletavych pramianiach, biełaje ci błakitnaje śviačeńnie (struktura papiery nie parušana);
-
śviačeńnie inšaha koleru va ŭltrafijaletavych pramianiach, raźmieščanaje ŭ miežach adnaho kvadrata sa staranoj 30 mm abo raźmieščanaje ŭ roznych častkach banknoty ŭ miežach troch kvadrataŭ, pamier kožnaha ź jakich nie pieravyšaje kvadrat sa staranoj 10 mm, pry hetym struktura papiery nie parušana, nie rassypajecca, nie kryšycca.
Ź liniejkaj i ciarpieńniem
Pieršy pachod u bank ledź było nie abiarnuŭsia pravałam ekśpierymientu: prypsavanyja dołary adrazu ž byli hatovyja pryniać u MTBanku.
Spačatku kasir uziałasia zamiarać płošču nadpisu śpiecyjalnymi «trafaretami», kab jany ŭpisalisia ŭ patrabavany kvadrat sa staranoj 2 sm.
Staraja kupiura pytańniaŭ nie vyklikała, a voś banknotu novaha ŭzoru razhladali bolš staranna.
Vierdykt: płošča nadpisu dazvalaje zrabić abmien valuty.
Zazirniem u susiedni Parytetbank. Paprasili pahladzieć, ci ŭsio narmalna z našymi banknotami i ci možna ich abmianiać biez kamisii. U adkaz pačuli suchoje «pravierka banknot płatnaja».
Idziem dalej. Čamu b nie pasprabavać pośpiech u Biełarusbanku?
Adstajali čarhu, praciahvajem kasiru $200 dla abmienu. Dziaŭčyna ŭvažliva ahledzieła kupiury z dvuch bakoŭ i adrazu ž adkłała: pryniać takija banknoty nie moža, varta pasprabavać źviarnucca ŭ pryvatnyja banki.
«U nas jość pracedura inkasa. Vy možacie zdać svaje banknoty na ekśpiertyzu. Kamisija — 5%. Ale terminy takoj pravierki mohuć dachodzić da paŭhoda», — patłumačyła rabotnik banka.
Skarystajemsia paradaj: u pryvatnych bankaŭ z hetym praściej. Jak pišuć biełarusy ŭ sietcy, čaściej za ŭsio ŭ ich atrymlivałasia zdać sapsavanyja kupiury ŭ abmieńnikach Technabanka. Praŭda, z kamisijaj.
Tak i akazałasia. Ale tut pytańni vyklikali plamy ŭžo na dvuch kupiurach — hrošy viarnuli. I tolki paśla ŭdakładniajučaha pytańnia, ci možna zdać hrošy z kamisijaj, adkazali, što taki varyjant jość — pad 9%. Heta, darečy, z $200 — bolš za Br50.
Nie hatovy rasstavacca z takoj sumaj, šukajem dalej. Pa darozie zazirnuli ŭ Bank RRB.
Tam uvažliva ahledzieli dołary, zaŭvažyli vizualnyja plamy i nadpisy i admovili ŭ abmienie valuty. I z kamisijaj taksama nie biaruć.
«Pasprabujcie Technabank, u ich možna abmianiać z kamisijaj», — raić viarnucca da kankurentaŭ kasir.
Zazirnuli ŭ Biełahraprambank. Dziaŭčyna ŭvažliva ahledzieła kupiuru i adrazu ž viarnuła tuju, što naviejšaja, ale ź vialikim nadpisam. Pryniać nie zmohuć, tolki praz praceduru inkasa, jakaja taksama zojmie šmat času.
A voś staruju banknotu byli hatovy ŭziać biez prablem.
Źviarnulisia ŭ Alfa Bank. Čarhovy raz usie plamy zamieryli liniejkaj: nadpis zdaŭsia tut zanadta vialiki, tamu novuju banknotu adrazu admovilisia pryniać. Staruju zdać možna biez kamisii.
Straciŭšy nadzieju, padumali viarnucca ŭ MTBank i pazbavicca ad nieidealnych dołaraŭ. Ale ŭsio ž vyrašyli jašče raz pašukać ščaście ŭ Parytetbanku, dzie pieršapačatkova nam admovili ŭ biaspłatnym ahladzie kupiury.
Ciapier prosta zdajem valutu, nie padajučy vidu, što ź joj niešta nie tak.
I tut na naša ździŭleńnie dołary pryniali biez usialakich vymiareńniaŭ ź liniejkaj. Prosta staranna ahledzieli vizualna i pad lampaj. Jak vynik — atrymali na ruki našy rodnyja biełaruskija rubli, patraciŭšy na chadžeńnie pa bankach kala dvuch hadzin.
Jakija hrošy sapraŭdy nie prymuć?
U praviłach, jakimi kirujucca banki, dakładna prapisana, jakija kupiury sapraŭdy nie atrymajecca pamianiać:
- kanfiskavanyja z abaračeńnia, a taksama ŭzory banknot z nadpisam Specimen i anałahičnyja;
- kali jość paškodžańni, jakija nie adpaviadajuć patrabavańniam u pieršaj častcy materyjału;
- jakija majuć nadpisy «Chabar», «Vykup», «Rekiet», «Złodziej», abraźlivyja, niecenzurnyja i inšyja nadpisy, damaloŭki;
- afarbavanyja śpiecyjalnaj farbaj, jakaja prymianiajecca pry praviadzieńni apieratyŭna-vyšukovych mierapryjemstvaŭ;
- razarvanyja (razrezanyja) na frahmienty / častki, u tym liku sklejenyja.
Nie atrymajecca viarnuć i hrošy z vytvorčym brakam, jakija stracili krai, frahmienty, a taksama jakija źmianili pieršapačatkovuju afarboŭku, bieskalarovyja častkova ci całkam, paškodžanyja ahniom, sparachniełyja, sa śladami tručeńnia ci ścirańni malunkaŭ, vilhotnyja, lipkija, źleplenyja ź inšymi banknotami.