Što ciapier z archivam KDB ab represijach u BSSR, jaki zmahli zdabyć byłyja siłaviki? Kali jaho apubličać?
U 2022 hodzie stała viadoma, što abjadnańnie byłych siłavikoŭ «Bajpoł» atrymała dostup da archivu KDB ab savieckich represijach u Biełarusi. Paśla raździaleńnia arhanizacyi na dźvie baza pierajšła da novastvoranaha «Biełpoła». Jaje pradstaŭnik Uładzimir Žyhar raskazaŭ, jak ciapier idzie apracoŭka infarmacyi.
Kamitet dziaržaŭnaj biaśpieki ŭ Minsku. Fota: Naša Niva
«Paśla reformy 2023 hoda (ab padzialeńni na «Biełpoł» i «Bajpoł» — NN) archiŭ zastaŭsia ŭ nas, i my jaho pieradali adnoj arhanizacyi dla analizu. Nu i tam usio zastoparyłasia. Jak zvyčajna, nie chapaje resursaŭ», — skazaŭ Uładzimir Žyhar «Našaj Nivie».
Sam «Biełpoł» taksama nie moža zaniacca apracoŭkaj fajła, bo maje šmat inšaj pracy. Niekalki miesiacaŭ tamu pracu pa kirunku vyrašyli adnavić, ale pakul «Biełpoł» nie moža skazać, ci heta ŭdasca.
Žyhar taksama adznačyŭ, što nie moža ahučyć nazvu arhanizacyi, jakaja zajmałasia apracoŭkaj bazy.
U 2022 hodzie ŭ rasparadžeńni «Bajpoła» akazaŭsia aličbavany archiŭ KDB ź infarmacyjaj pra represavanych za Savietami biełarusaŭ. U im — tysiačy i tysiačy proźviščaŭ, ale dakładnaja ličba publična nie nazyvałasia.
U 2023 hodzie «Bajpoł» raskałoŭsia na dźvie častki: pad staroj nazvaj zastalisia pracavać Alaksandr Azaraŭ i Stanisłaŭ Łupanosaŭ, a Maćviej Kuprejčyk, Uładzimir Žyhar i niekatoryja inšyja byłyja siłaviki pačali pracavać pad novym brendam «Biełpoł».