Čym viadomy Chasiejn Sałami — kamandujučy, jaki zahinuŭ padčas izrailskaha ŭdaru
65-hadovy Sałami byŭ viadomy svajoj žorstkaj pazicyjaj u adnosinach da praciŭnikaŭ Irana, u pryvatnaści, Izrailu i ZŠA.
Fota: Stringer/Anadolu via Getty Images
Chasiejn Sałami, kamandujučy iranskaha Korpusa vartavych isłamskaj revalucyi (KVIR), zahinuŭ u noč na piatnicu, 13 červienia, padčas avijaŭdaraŭ Izraila, piša Bi-bi-si.
65-hadovy Sałami byŭ viadomy svajoj žorstkaj pazicyjaj u adnosinach da praciŭnikaŭ Irana, u pryvatnaści, Izrailu i ZŠA.
Tolki ŭ hetym miesiacy jon pahražaŭ, što ŭ vypadku, jak chto-niebudź ź ich napadzie na krainu, Tehieran «adkryje bramu piekła».
Niahledziačy na papiaredžańnie Donalda Trampa ab tym, što ŭdary mohuć paškodzić patencyjnaj uhodzie pa jadziernaj prahramie Irana, Izrail nanios udary, paŭtarajučy, što celić pa jadziernych abjektach, zavodach, jakija vyrablajuć balistyčnyja rakiety i pa kamandnych punktach.
Tehieran śćviardžaje, što Izrail i ZŠA (niahledziačy na toje, što tam admaŭlajuć dačynieńnie da ataki), zapłaciać «ciažkuju canu». A heta ŭmacoŭvaje aściarohi, što ŭdar moža pryvieści da razhortvańnia poŭnamaštabnaj vajny ŭ i biez taho niestabilnym rehijonie.
Padčas izrailskich udaraŭ zahinuli taksama i Machamad Bahiery, hałoŭnakamandujučy iranskich Uzbrojenych sił, Hałamali Rašyd, namieśnik hałoŭnakamandujučaha, a taksama niekalki navukoŭcaŭ-jadzierščykaŭ.
Usiaho za dzień da taho, jak Izrail nanios udary, Sałami skazaŭ, što Iran «całkam hatovy da luboha scenaru, situacyi i abstavin».
«Vorah dumaje, što jon moža vajavać ź Iranam tak, jak jon vajuje ź biezabaronnymi paleścincami, jakija znachodziacca pad abłohaj Izraila, — zajaviŭ jon. — Ale my vyprabavanyja vajnoj i majem dośvied». Sałami dałučyŭsia da Korpusa vartavych revalucyi — asobnaha ŭpłyvovaha padraździaleńnia iranskaj armii — u 1980 hodzie padčas irana-irakskaj vajny, a ŭ 2009 staŭ namieśnikam kamandujučaha. Jašče praź dziesiać hadoŭ jon uznačaliŭ Korpus.
Z pačatku 2000-ch jon znachodzicca ŭ sankcyjnym śpisie Rady Biaśpieki AAN i ZŠA za ŭdzieł u iranskaj jadziernaj i inšych vajskovych prahramach.
Sałami časta vychvalaŭsia mocaj Irana, až da taho, što zajaviŭ, što jaho kraina ŭžo «za krok ad taho, kab stać suśvietnaj siłaj».
Jon taksama vitaŭ mahčymaść vajennaha kanfliktu ź Izrailem i ZŠA. Paśla izrailskich udaraŭ pa Siryi ŭ 2019 hodzie Sałami paabiacaŭ «ścierci sijaniscki režym» z karty śvietu.
Paśla inšaha ŭdaru pa iranskaj ambasadzie ŭ Siryi, padčas jakoha zahinuli siem pradstaŭnikoŭ KVIR, uklučajučy dvuch hienierałaŭ, Sałami zrabiŭ padobnuju zajavu: «našy advažnyja mužčyny pakarajuć sijaniscki režym».
Iran i Izrail byli sajuźnikami da 1979 hoda, kali ŭ Tehieranie adbyłasia revalucyja, padčas jakoj da ŭłady pryjšli siły, častkaj ideałohii jakich było supraćstajańnie ź Izrailem.
Ciapierašni iranski režym nie pryznaje prava Izraila na isnavańnie. Lidar krainy, ajatała Ali Chamieniei nazvaŭ Izrail «rakavaj puchlinaj», jakaja «abaviazkova budzie vydalenaja i źniščanaja».
Izrail kaža, što takaja rytoryka Tehierana robić Iran ekzistencyjalnaj pahrozaj dla krainy.
Izrail i jaho sajuźniki taksama asudzili Iran za padtrymku maryjanietkavych sił u rehijonie, uklučajučy Chiezbału, livanskuju šyickuju vajenizavanuju hrupu, jakaja paabiacała źniščyć Izrail.
Sałami byŭ pastajannym daradcam iranskaha lidara.
Chto takija Vartavyja iranskaj revalucyi
Relihijnyja lidary Irana stvaryli Korpus vartavych revalucyi 40 hadoŭ tamu, kab abaranić isłamskuju sistemu ŭłady ŭ krainie i stvaryć procivahu rehularnaj armii, jakoj jany nie daviarali.
Zaraz KVIR maje kala 190 tysiač voinaŭ, a taksama vychvalajecca svaimi ŭłasnymi bazami, marskimi i pavietranymi siłami, a tamu źjaŭlajecca samaj mahutnaj vajennaj i palityčnaj siłaj u krainie, jakuju bajacca.
Kali rehularnaje iranskaje vojska abaraniaje terytoryju krainy, to Korpus vartavych abaraniaje ŭłasna isłamski režym.
Korpus padparadkoŭvajecca niepasredna Viarchoŭnamu lidaru krainy, i jaho dziejnaść ciažka pravieryć inšym dziaržaŭnym instytutam.
KVIR taksama naziraje za stratehičnaj zbrojaj krainy, a taksama vajenizavanymi siłami supracivu BASIŽ, jakija časta vykarystoŭvajucca dla padaŭleńnia ŭnutranych biesparadkaŭ.
Ličać taksama, što vartavyja revalucyi kantralujuć da traciny iranskaj ekanomiki praź sistemu trast i daččynych kampanij. Akramia taho, KVIR atrymlivaje miljardy dalaraŭ ad budaŭničych i infrastrukturnych kantraktaŭ. Hrupa maje ŭpłyŭ na ŭsim Blizkim Uschodzie dziakujučy pradastaŭleńniu hrošaj, zbroi, technałohij, navučańnia i savietaŭ sajuznym uradam.
Siarod vartavych revalucyi jość i elitnaja hrupa sił śpiecyjalnaha pryznačeńnia al-Kuds, jakaja ažyćciaŭlaje cieniavyja apieracyi za miežami krainy, uklučajučy Afhanistan, Irak, Livan, Paleścinskija terytoryi i Jemien.
Byłyja kvir-aficery zajmajuć upłyvovyja pasady va ŭradzie, parłamiencie i inšych uładnych strukturach Irana. Siarod ich i były prezident krainy Machmud Achmadziniedžad i były śpikier parłamienta Ali Łajdžani.