U Hrodnie asudzili žančynu, što stała kurjeram telefonnych machlaroŭ
U sudzie Leninskaha rajona Hrodna na dniach razhladałasia sprava ab machlarstvie ŭ bujnym pamiery. Na łavie padsudnych akazałasia žančyna, jakaja pracavała kurjeram telefonnych ašukancaŭ.
Achviaraj złamyśnikaŭ stała 83-hadovaja žycharka Hrodna. Piensijaniercy zajavili, što valutu, jakaja jość u jaje, treba dekłaravać. U vyniku jana pieradała hetaj žančynie 49 000 dalaraŭ, piša Newgrodno.by.
Historyja dla piensijanierki skončyłasia paśpiachova. Kurjera apieratyŭna zatrymali, a haspadyni viarnuli hrošy ŭ poŭnym abjomie. «U sudovym pasiadžeńni abvinavačanaja vinu ŭ pradjaŭlenym abvinavačańni nie pryznała, patłumačyŭšy, što hrošy zabrać jaje paprasiŭ znajomy, ab złačynnych namierach jakoha jana nie padazravała», — havorycca ŭ paviedamleńni suda.
Sud pryznaŭ žančynu vinavataj. Jana pryhavorana da 4,5 hoda kałonii ahulnaha režymu (ale pa amnistyi 1 hod abvinavačanaj źniali). Taksama kurjera ašukancaŭ aštrafavali na 70 bazavych vieličyń (2940 rubloŭ).
Prysud suda nie ŭstupiŭ u zakonnuju siłu i moža być abskardžany i apratestavany ŭ vyznačanym paradku.