«Biełorusskije produkty» ŭ Kazachstanie trapili ŭ moŭny skandał

Kazachstanskija miedyja paviedamlajuć pra skandał, u jaki ŭ krainie trapiła sietka kramaŭ «Biełorusskije produkty». Jak zajaŭlajecca, pradpryjemstva zabaraniała miascovym pracaŭnikam razmaŭlać pamiž saboju na rodnaj movie, piša «Biełsat».

Krama «Biełorusskije produkty» ŭ Kazachstanie. Fota: yandex.net

Sietka kramaŭ «Biełorusskije produkty» pazicyjanuje siabie jak aficyjnaha dystrybjutara viadučych zavodaŭ Biełarusi na terytoryi Kazachstana. Ich asartymient, jak zajaŭlajecca, uklučaje bolš jak 2500 najmieńniaŭ miasnych, kaŭbasnych i małočnych vyrabaŭ, kansiervavanaj pradukcyi i paŭfabrykataŭ, morapraduktaŭ, sousaŭ i kandytarskich vyrabaŭ.

Na siońnia sietka pradstaŭlenaja bolš jak 100 kramami ŭ samych bujnych haradach Kazachstana. Jany pradstaŭlajuć pradukcyju samych bujnych zavodaŭ-vytvorcaŭ Minska, Viciebska, Hrodna, Bresta, Homielščyny i Mahiloŭščyny, «zabiaśpiečvajučy bieśpierabojnyja pastaŭki śviežych praduktaŭ u samyja karotkija terminy».

Ale niadaŭna ŭ ich uźnikli peŭnyja prablemy. «Tił kieśpiek žoq» piša, što napačatku maja «Biełorusskije produkty» trapili pad krytyku ŭ sietcy Threads.

Zajaŭlałasia, što adna z supracoŭnic buchhałtarskaha adździeła kampanii, Ajhul Amanhiełdzijeva, padvierhnułasia cisku za toje, što razmaŭlała pa-kazachsku z kalehaj padčas pracy, i joj heta zabaraniali.

«Nas pačali pieraśledavać paśla taho, jak nam zajavili, što na pracy my tak havorym pa-rasiejsku, a pamiž saboj havorym na rodnaj movie», — skazała Ajhul.

Pavodle jaje, hałoŭnaja buchhałtarka Śviatłana Bielanovič adčytała ich, zapatrabavaŭšy razmaŭlać nie pa-kazachsku, a «na zvyčajnaj movie, jakuju razumiejuć usie». Na zaŭvahu, što pamiž saboju kazachi praciahnuć razmaŭlać pa-kazachsku, na ich pačali kryčać. Paźniej na Ajhul nibyta nakłali štraf, skłali pratakoł i padvierhnuli, pavodle jaje, psichałahičnamu cisku:

«U mianie padniaŭsia cisk, i ja vyklikała chutkuju dapamohu».

Ajhul paviedamiła pra cisk, jakomu jana padviarhałasia, svajmu kiraŭnictvu i adździełu kadraŭ. Adnak, pavodle jaje, nichto nie raspačaŭ nijakich adpaviednych dziejańniaŭ i nie pacikaviŭsia jaje stanam. U vyniku žančyna sama zvolniłasia z pracy.

I choć pra zabaronu razmaŭlać u kampanii pa-kazachsku kažuć i inšyja byłyja pracaŭniki, sami «Biełorusskije produkty» admaŭlajuć heta. Žančynu ŭ kampanii abvinavacili ŭ chłuśni i ŭ raspalvańni mižnacyjanalnaj varažniečy.

Heta nie pieršy skandał z udziełam biełarusaŭ u Kazachstanie sioleta. Praŭda, minuły byŭ bolš pazityŭnym. Naprykancy sakavika biełaruskija turysty vykłali videa taho, jak patrulnyja spynili ich u Turkiestanskaj vobłaści Kazachstana. Pavodle biełarusaŭ, u ich zapatrabavali 200 tysiačaŭ tenhie za adsutnaść kazachskaha techahladu i traplańnie na kamieru. Turysty adznačyli, što ničoha nie parušali i dokazaŭ im nie dali, ale jany «prosta zapłacili i pajechali dalej».

U darožnaj palicyi Turkiestanskaj vobłaści pačali kryminalnuju spravu, a ŭ dačynieńni kiraŭnictva adpaviednaha padraździaleńnia — słužbovaje rasśledavańnie. Aproč taho, vinavatych palicyjantaŭ zvolnili. Vice-ministr turyzmu i sportu Kazachstanu Jeržan Jerkinbajeŭ zajaviŭ, što «sapraŭdy, taki vypadak byŭ. I heta nie adziny vypadak».

Kamientary da artykuła