U niebie nad Kazachstanam zaŭvažyli niezvyčajnyja abjekty. Niekatoryja pabačyli śled, padobny da rasijskiha «Arešnika»
Ale Minabarony krainy pierakanała, što nijakaha napadu na Kazachstan nie adbyłosia.
Skrynšot ź videa
Padajučyja abjekty zaŭvažyli ŭ niebie nie tolki nad Astanoj, ale i nad inšymi haradami Kazachstanu. U internecie ich adrazu paraŭnali z rasijskaj balistyčnaj rakietaj «Arešnik».
Ministerstva abarony krainy abvierhła hetu teoryju: pavietranuju prastoru Kazachstanu nichto nie parušaŭ.
«Dadzienaja źjava padobna na reštki abłomkaŭ kaśmičnaha aparata, što ŭvachodziać u atmaśfieru, ci na mietearytny strumień. Jak praviła, usie jany zharajuć u ščylnych płastach atmaśfiery, nie dalatajučy da ziamnoj pavierchni.
Prosim hramadzian zachoŭvać spakoj i nie raspaŭsiudžvać niedakładnuju infarmacyju. Kampietentnyja orhany vyvučajuć dadzienuju źjavu i padaduć tłumačeńni», — zajavili ŭ ministerstvie.