Francuzski tyktokier pryhatavaŭ biełaruskuju babku pad pieśniu Karža — i vyklikaŭ sprečku ab prynaležnaści Branska
Papularny tyktokier DriceCook hatuje stravy roznych krain, jakija vybiraje z dapamohaj drocika i karty. Hetym razam jon trapiŭ u Biełaruś.
DriceCook — davoli papularny francuzski tyktokier, u jaho miljon padpisčykaŭ. Jaho farmat — heta pryhatavańnie straŭ z kuchniaŭ roznych krain. Krainu jon vybiraje vypadkovym čynam: kidaje drocik u kartu śvietu. Niadaŭna jon trapiŭ u Biełaruś.
Błohier vybraŭ dla pryhatavańnia babku. U recepcie jon vykarystaŭ smažanuju hrudzinku, ciortuju bulbu, cybulu, muku, jajki i syr. Hatavaŭ babku tyktokier pad pieśniu Maksa Karža.
Rolik užo nabraŭ bolš za try miljony prahladaŭ i amal dźvie tysiačy kamientaryjaŭ. Voś tolki pad videa razharnułasia niečakanaja dyskusija. Ludzi abmiarkoŭvali nie recept, a dakładnaść błohiera. Mnohim hledačam padałosia, što jon trapiŭ nie ŭ Biełaruś, a ŭ Rasiju.
«Kali Bransk staŭ Biełaruśsiu?» — spytała adna z kamientatarak. Na heta francuz biez vahańniaŭ adkazaŭ, što trapiŭ u Chocimsk — pasiołak amal na samaj miažy z Rasijaj.
U vyniku pad hetym kamientaryjami pačałasia zaciataja histaryčnaja sprečka ab tym, ci byŭ kaliści Bransk biełaruskim. Anałahičnyja sprečki ŭźnikli i nakont Smalenskaj vobłaści: kamuści padałosia, što drocik prylacieŭ mienavita tudy.
Dla spraviadlivaści, abmiarkoŭvali pad videa i recept. Mnohija pisali, što heta nienaturalnaja babka, maŭlaŭ sapraŭdnuju hatujuć tolki ŭ čyhunnym haršku ŭ piečy, bulbu truć na bolš drobnaj tarcy, dy i sała vykarystoŭvajuć bieź miasa. Chtości aburaŭsia, što syr u babku nichto nie vykarystoŭvaje. Adnak, inšyja adznačali, što babku ŭsiudy hatujuć pa-roznamu.
A jašče tyktokieru dziakavali za toje, što jon nie staŭ hatavać banalnyja draniki. DriceCook na heta adkazaŭ, što hetaja strava jamu taksama vielmi padabajecca.
Chtości z hledačoŭ pachvaliŭ błohiera za toje, što jon akuratna pačyściŭ bulbu: «Tolki za toje, jak bieražliva čyścić bulbu, užo možna biełaruskaje hramadzianstva davać!»