U histaryčnym centry Hrodna razburyli jašče dva staryja damy

Na darevalucyjnych budynkach źbiralisia razabrać avaryjnyja ŭčastki ścien, a ŭ vyniku adzin z fasadaŭ abrynuŭsia całkam.

Razvał cehły na miescy zdareńnia. Fota: NewGrodno.By

Pra heta paviedamlaje telehram-kanał Urban Hrodna.

Damy 31 i 33 pa Vialikaj Trajeckaj vulicy, pabudavanyja ŭ kancy XIX — pačatku XX stahodździa, vykupili ŭ 2022 hodzie. Novy ŭłaśnik, hrodzienskaja firma «FrutPak», źbirałasia adkryć u ich restaran sa scenaj dla kancertaŭ, a ŭ padvale — piakarniu.

Pavodle dakumientacyi, raspracavanaj miascovaj budaŭničaj firmaj «ARS Deko», dzie pasadu namieśnicy dyrektara zajmaje byłaja hałoŭnaja architektar Hrodna Volha Barejka, budynki byli ŭ avaryjnym stanie, u ich byccam by praktyčna adsutničali padmurki.

Razborka ścien damoŭ 31 i 33 pa Vialikaj Trajeckaj vulicy. Fota: Urban Hrodna

Damy pa Vialikaj Trajeckaj vulicy paśla abvalvańnia fasada. Fota: Urban Hrodna

U čas rekanstrukcyi źbiralisia ich abjadnać i adnavić histaryčnaje abličča — detali dekoru, stračanyja ŭ saviecki čas, bałkony, ustanavić draŭlanyja dźviery i vitryny, a taksama viarnuć bramy, jakija viali z dvara na vulicu. Avaryjnyja ŭčastki ścien pavinny byli demantavać i adnavić z zachavańniem habarytaŭ i vonkavaha vyhladu z «rodnaj» kieramičnaj cehły.

Rekanstrukcyja pačałasia ŭ 2025 hodzie, ale ŭžo paśla pačatku razborki ścien damoŭ fasad doma № 31 ranicaj 2 červienia całkam abvaliŭsia. Cehła prabiła aharodžu budoŭli i rassypałasia na prajeznuju častku. U vyniku zdareńnia nichto nie paciarpieŭ. 

Damy 31 i 33 pa Vialikaj Trajeckaj vulicy da pačatku rekanstrukcyi. Fota: Viačerni Hrodna

Prajektnaje rašeńnie fasadaŭ pavodle materyjałaŭ z hramadskaha abmierkavańnia.

Heta niaredki vypadak, kali ŭ čas rekanstrukcyi, vypadkova, a mienavita praz adsutnaść narmalnaha ŭmacavańnia nienadziejnych kanstrukcyj, razburajecca bolš, čym praduhledžana pa prajekcie. Hetaja prykraja situacyja robić rekanstrukcyju bolš tannaj i prostaj dla zakazčyka, prajekciroŭščykaŭ i padradčykaŭ.

Taksama źviartaje na siabie ŭvahu toje, što takija harady jak Hrodna i Brest apanavała epidemija avaryjnych histaryčnych budynkaŭ, jakija byccam nie majuć anijakich padmurkaŭ, pakazvajuć znos kanstrukcyj pad 100% i, adpaviedna, źjaŭlajucca avaryjnymi, ale prastajali bolš za stahodździe i nie mieli nijakich źniešnich prykmiet razbureńnia až da taho momantu, jak ich nie pačali «rekanstrujavać», raźbirajučy da padmurkaŭ.

Kamientary da artykuła