«Vołat. Žyćcio na nuli»: dakumientalny film pamiaci lehiendarnaha kamandzira

Połk Kastusia Kalinoŭskaha pradstaviŭ unikalnyja kadry apošnich dzion žyćcia Paŭła «Vołata» Susłava.

Pavieł «Vołat» Susłaŭ z bajcami pierad vychadam u raźviedku. Skryn videa BELARUSFREEDOMFIGHTERS / YouTube

Roŭna try hady tamu, 15 maja 2022 hoda ŭ apieracyi pa vyzvaleńni ŭkrainskaha siała na styku Mikałajeŭskaj i Chiersonskaj abłaściej zahinuŭ kamandzir roty raźviedki na toj čas bataljona imia Kastusia Kalinoŭskaha Pavieł Susłaŭ z pazyŭnym «Vołat».

Dla ŭradženca Homiela vajna pačałasia ŭ 2016 hodzie, kali jon praz hod paśla prachodžańnia terminovaj słužby ŭ raźviedvalnaj rocie 3-j bryhady biełaruskaha śpiecnaza (v/č 3214) adpraviŭsia na Danbas, dzie dałučyŭsia da 1-j šturmavoj roty «Pravaha siektara».

U 2018 hodzie Pavieł zaklučyŭ kantrakt z Uzbrojenymi siłami Ukrainy. Zajmaŭsia raźviedvalnaj i dyviersijnaj dziejnaściu. U 2022 hodzie bajec udzielničaŭ u farmavańni bataljona imia Kastusia Kalinoŭskaha. U im jon uznačaliŭ rotu raźviedki.

Za šeść hadoŭ, što Vołat addaŭ Ukrainie, jon pakidaŭ zonu bajavych dziejańniaŭ tolki trojčy — kali byŭ surjozna paranieny. I kožny raz znoŭ viartaŭsia na pieradavuju.

Aŭtar filma pradstaviŭ unikalnyja kadry, jakija znajomiać ź piaćciu dniami z žyćcia biełaruskich dobraachvotnikaŭ i ich kamandzira ŭ pieršyja miesiacy poŭnamaštabnaj vajny.

Film składajecca z troch častak, pieršaja ź jakich była vystaŭlena na jutub-kanale Pałka Kalinoŭskaha ŭ treciuju hadavinu hibieli Paŭła «Vołata».

Pavieł «Vołat» Susłaŭ. Fota: th-kanał bataljona Kastusia Kalinoŭskaha

Aŭtaram filma źjaŭlajecca biełaruski dobraachvotnik, jaki ŭ mirnym žyćci byŭ dyzajnieram i nie mieŭ vajskovaha dośviedu. Jon aktyŭna zdymaje ŭsio, što adbyvajecca, — darohu na front, pobyt bajcoŭ na pieradavoj, bajavyja zadačy, razmovy ź inšymi dobraachvotnikami.

Jaho meta — zafiksavać sapraŭdny tvar vajny, pakazać, što biełaruskija dobraachvotniki «nie siadziać biez spravy, a vajujuć». Film bałansuje pamiž dakumientalnym śviedčańniem, asabistym dziońnikam i psichałahičnym partretam frantavoha žyćcia.

Centralnaj fihuraj filma źjaŭlajecca kamandzir raźviedčykaŭ Pavieł «Vołat» Susłaŭ. Bajcy jaho słuchajucca i pavažajuć. Sam aŭtar zhadvaje, što paznajomiŭsia ź im 1 sakavika 2022 hoda.

Mienavita Vołat biare na siabie misiju ŭvieści mužčynu ŭ realnaść vajny, tłumačyć jamu, jak siabie pavodzić padčas abstrełu, jak raspaznavać huki snariadaŭ, kali chavacca, a kali — dziejničać. Heta navučańnie adbyvajecca nie na palihonie, a niepasredna na linii frontu.

«Ja budu rabić usio, što mnie skaža Vołat. Bo heta moj najlepšy šaniec tut vyžyć», — adznačaje sam aŭtar.

Film nie tolki fiksuje padziei, ale i adkryvaje Vołata jak asobu. Jon nie prosta kamandzir — jon centralny nierv sistemy. Bajcy dzielacca svaimi ŭražańniami:

«Kali ja Vołata ŭbačyŭ, kali jon raździeŭsia, ja achu**. U jaho askiepki ŭ nahach, u śpinie. I šyja… Jamu snajpier lohkaje prabiŭ, šyju, hałavu. Askiepak u hałavu zalacieŭ. (…) Jon u komie try tydni lažaŭ. Vykaraskaŭsia».

U pieršaj častcy pakazanyja nie tolki bajavyja momanty, kštałtu vychadu Vołata z hrupaj bajcoŭ u raźviedku («Vołat časta zachodziŭ nastolki daloka da varožych pazicyj, što suviazi ź im amal nikoli nie było»), niasieńnie bajavoha dziažurstva pa pierymietry siała Kalinindorf, ale i vajskovy pobyt. Šmat razmoŭ ź inšymi bajcami, demanstracyja vynikaŭ abstrełaŭ, pošuk internetu, kab adpravić paviedamleńni, historyja pra sproby schadzić u sarcir, raskazanaja Žeraram. Usio heta farmiruje adčuvańnie prysutnaści.

«Na pazicyjach u mianie była mahčymaść adpačyć, padumać pra niejkija druharadnyja rečy, nakštałt taho, jak zaradzić GoPro. U Vołata takoj mahčymaści nie było. U jaho nie było padobnaha volnaha času. Jon byŭ zasiarodžany na bajavoj zadačy i jaje vykanańni. Na jaho plačach lažała adkaznaść za ŭvieś siektar, za svaich bajcoŭ i za sumiežnyja padraździaleńni, jakija prykryvali našy fłanhi.

Jamu treba było kantralavać usio, kab usie vykonvali svaje zadačy, kab kožnaja pazicyja vykonvała mienavita svaju funkcyju. A z-za taho, što na vajnie nikoli ničoha nie idzie pa płanie, treba było jašče i znachodzić vyjście z kryzisnych situacyj.

Aproč hetaha, jon zaŭsiody asabista vyvodziŭ hrupu ŭ raźviedku i išoŭ pieršym. Heta parušała niehałosnaje praviła: kamandzir nikoli nie pavinien iści pieršym. Ale jon biaroh svaich ludziej i rabiŭ tak zaŭsiody, da apošniaha», — dzielicca aŭtar uspaminami.

Pieršaja častka filma achoplivaje dvoje sutak frantavoha žyćcia — z momantu prybyćcia na pazicyi da zakančeńnia druhoha dnia. U kancy ŭ kadry źjaŭlajecca jašče adzin viadomy biełaruski dobraachvotnik — Ivan «Brest» Marčuk.

Kamientary da artykuła