ZŠA i Saudaŭskaja Aravija padpisali rekordnuju ździełku pa zbroi na $142 miljardy ŭ pieršy dzień vizitu Trampa na Blizki Uschod
Bieły dom zajaŭlaje, što ŭ pieršy dzień vizitu prezidenta Donalda Trampa na Blizki Uschod pamiž ZŠA i Saudaŭskaj Aravijaj było padpisana «najbujniejšaje pahadnieńnie ab prodažy abaronnaj pradukcyi ŭ historyi».
Fota: instahram Biełaha doma
Akramia hetaha byli zaklučanyja i inšyja ekanamičnyja ździełki. Paśla Er-Ryjada Tramp nakirujecca ŭ Katar i AAE, piša Bi-bi-si.
U zajavie Biełaha doma havorycca, što košt zbrojevaha pahadnieńnia pamiž krainami skłaŭ 142 miljardy dalaraŭ i ŭklučaje pastaŭku Saudaŭskaj Aravii «sučasnaha bajavoha abstalavańnia i pasłuh prykładna ad paŭtara dziasiatka amierykanskich abaronnych kampanij».
Pahadnieńnie zaklučana ŭ piaci katehoryjach:
- Raźvićcio VPS i kaśmičnyja mahčymaści
- Pavietranaja i supraćrakietnaja abarona
- Marskaja i prybiarežnaja biaśpieka
- Biaśpieka miežaŭ i madernizacyja suchaputnych vojskaŭ
- Madernizacyja infarmacyjna-kamunikacyjnych sistem
Pakiet taksama ŭklučaje «maštabnuju padrychtoŭku i padtrymku dla naroščvańnia patencyjału ŭzbrojenych sił Saudaŭskaj Aravii, uklučajučy ŭmacavańnie saudaŭskich vajskovych akademij i vajenna-miedycynskich słužbaŭ».
Akramia taho, u pres-relizie Biełaha doma pieraličvajucca inšyja pahadnieńni, dasiahnutyja ŭ aŭtorak.
U pryvatnaści, Saudaŭskaja Aravija abaviazałasia inviestavać u ZŠA 600 miljardaŭ dalaraŭ. Adna z abłaściej inviestycyj — heta centry apracoŭki dadzienych štučnaha intelektu pa ŭsioj terytoryi ZŠA.
Amierykanskija technałahičnyja kampanii, u svaju čarhu, abaviazalisia inviestavać 80 miljardaŭ dalaraŭ u «pieradavyja pieraŭtvaralnyja technałohii ŭ abiedźviuch krainach».
Taksama ZŠA buduć ekspartavać u Saudaŭskuju Araviju hazavyja turbiny i enierhietyčnyja technałohii na sumu 14,2 miljarda dalaraŭ i pasažyrskija samaloty Boeing 737-8 na sumu 4,8 miljarda dalaraŭ.
Krainy taksama damovilisia ab supracoŭnictvie pamiž enierhietyčnym i hornazdabyŭnym siektarami ekanomiki.
Pakul Donald Tramp sustrakaŭsia z kiraŭnictvam dziaržavy, u pryvatnaści z kronpryncam Machamiedam bin Sałmanam, pieramovy z najbujniejšymi pradstaŭnikami saudaŭskaha biźniesu viali siabry amierykanskaj delehacyi: daradca Trampa miljarder Iłan Mask, hienieralny dyrektar kampanii OpenAI Sem Altman i kiraŭnik kampanii-hihanta pa vytvorčaści kampjutarnych čypaŭ Nvidia Džensen Chuanh.
Heta pieršy aficyjny zamiežny vizit Trampa z pačatku novaha prezidenckaha terminu. U najbližejšyja dni jon płanuje naviedać jašče dźvie krainy Blizkaha Uschodu: Katar i AAE.