ICAO pryznała adkaznaść Rasii za źbivańnie rejsa MH17
Rada mižnarodnaj arhanizacyi hramadzianskaj avijacyi (ICAO) vyrašyła, što źbivańniem samalota MN17 u lipieni 2014 hoda Rasija parušyła Kanviencyju ab mižnarodnaj hramadzianskaj avijacyi. Pra heta paviedamlaje «Jeŭrapiejskaja praŭda» sa spasyłkaj na MZS Niderłandaŭ.
MN17
Sprečku suprać Rasii ŭ ICAO inicyiravali Niderłandy i Aŭstralija ŭ sakaviku 2022 hoda. 12 maja hetaha hoda Rada mižnarodnaj arhanizacyi hramadzianskaj avijacyi vyznačyła, što adkaznaść za źbivańnie rejsa MN17 lažyć na Rasii.
Nastupnym krokam pavinna stać vyznačeńnie formy kampiensacyi z boku Rasii. Spačatku IKAO pavinna abaviazać krainu pačać pieramovy ź Niderłandami i Aŭstralijaj i sadziejničać hetamu pracesu.
Maskva jašče letam 2024 hoda zajaviła ab adnabakovym spynieńni ŭdziełu ŭ sprečcy ŭ mižnarodnaj arhanizacyi hramadzianskaj avijacyi.
U lutym 2025 hoda svajaki achviar trahiedyi, u jakoj zahinuli 298 čałaviek, patrabavali pryznańnia Rasijaj adkaznaści jak častku mirnaj damovy z Ukrainaj.
Akruhovy sud Haahi 17 listapada 2022 hoda zavočna prysudziŭ da pažyćciovaha źniavoleńnia Ihara Hirkina, Siarhieja Dubinskaha i Leanida Charčanku za ich rolu ŭ źbivańni małajzijskaha łajniera MH17 nad Danbasam i daručyŭ zabiaśpiečyć ich aryšt.
Sud pastanaviŭ, što jany pavinny vypłacić svajakam zahinułych bolš za 16 młn jeŭra kampiensacyj. Rasija admoviłasia vydać troch datyčnych da źbivańnia samalota.