Błohier-pravakatar Virus vypadkova spaliŭ svajho infarmatara. Jon apublikavaŭ skrynšot, zrobleny Volhaj Siamaška
Sama Siamaška śćviardžaje, što sapraŭdy pierasyłała hety skrynšot, ale treciaj asobie.
Vital Kandracienka padčas strymu
Błohier Vital «Virus» Kandracienka — piersanaž, jaki pryśviačaje ŭvieś svabodny čas tamu, što plažyć biełaruskuju apazicyju, vykarystoŭvajučy kožnuju nahodu i pierakručvajučy lubyja naviny. «Naša Niva» padrabiazna pisała bijahrafiju hetaha dziŭnaha čałavieka ź niekalkimi sudzimaściami za kradziažy, jaki źniadkul uspłyŭ u 2020-m.
Čytajcie: Chto taki błohier-kanśpirołah Virus, jaki štodnia abražaje i plažyć biełaruski demakratyčny ruch?
Siarod jaho asnoŭnych vorahaŭ Śviatłana Cichanoŭskaja i jaje kamanda, a taksama Andrej Stryžak z Alaksiejem Lavončykam, jakija vybudavali davoli paśpiachovuju sistemu finansavaj padtrymki paciarpiełych ad represij.
9 maja Virus apublikavaŭ u svaim kanale dopis, u jakim u čarhovy raz prajšoŭsia pa asobie Lavončyka.
«…Chaču źviarnuć vašu ŭvahu na kamientary hetaha niedačałavieka, tam jość usio, ad pychlivaści da łukašyzmu, ad chłuśni da narcysizmu. I kolki my budziem davać hetym niedaludziam parazitavać na našym hramadstvie?..», — znoŭ skaciŭsia da abrazaŭ aŭtar.
Nahodaj stała publičnaja fejsbuk-dyskusija pamiž Alaksiejem Lavončykam i kiraŭnicaj Biełaruskaha PENa Taćcianaj Niadbaj. Adnak samaje cikavaje nie heta.
Asablivaść fejsbuka ŭ tym, što kali luby karystalnik čytaje dyskusiju, to ŭ miescach, dzie možna pakinuć kamientar, adlustroŭvajecca jaho avatarka.
U skrynšotach, apublikavanych Virusam, možna ŭbačyć avatarku, na jakoj vyjava žančyny na fonie ŭkrainskaha i biełaruskaha ściahoŭ.
Skrynšot z kanała Virusa. Maleńkim kružkom pakazvajecca avatar aŭtara skrynšota. A ŭnizie jašče i napisana, što možna prakamientavać dopis ad imieni «Olga Sema…»
Chto ž rabiŭ skrynšot dla pamyjnaha kanała pra biełaruskuju apazicyju? Heta Volha Siamaška — taja samaja žurnalistka, siamji jakoj było pryśviečana rasśledavańnie «Našaj Nivy». Muž Siamaški, historyk-ajcišnik Fiodar Harbačoŭ, maje dakumient prykryćcia na čužoje imia, a značyć, źjaŭlajecca ahientam łukašenkaŭskich śpiecsłužbaŭ. Sama žurnalistka admaŭlaje abvinavačvańni i kaža, što ničoha nie viedaje pra druhi pašpart.
Čytajcie: Fiodar Viktaravič i «Viktar Fiodaravič». Supracoŭnik «Varhiejminha» maje pašpart prykryćcia. Jaho žonka Volha Siamaška — viadomaja žurnalistka
Volha Siamaška. Fota: fejsbuk
Jak ciapier vyjaŭlajecca, Siamaška źjaŭlajecca adnym ź infarmataraŭ kanała pravakatara Virusa. Mahčyma, jašče i aŭtaram?
Źviartaje na siabie ŭvahu toj fakt, što leksika Kandracienki krajnie abmiežavanaja. Jahonyja farmuloŭki prymityŭnyja, paŭtarajucca ad dopisu da dopisu. A ŭ siońniašnim dopisie pra Lavončyka vykarystoŭvacca absalutna nieŭłaścivyja jamu kanstrukcyi. Słova «narcysizm» u jahonym kanale nie sustrakałasia ni razu za ŭvieś čas. Abarot «vsiem priviet», ź jakoha pačynajecca dopis, apošni raz užyvaŭsia čatyry miesiacy tamu — choć stročyć Virus ledź nie kožny dzień i zvyčajny nie vitajecca z aŭdytoryjaj takimi słovami.
Dy i ŭ «aŭtarskich» dopisach, pryśviečanych Lavončyku, Virus zvyčajna nie ŭpuskaje mahčymaści pierarabić proźvišča apanienta, dadaŭšy ŭ jaho siaredzinu słova «voń». Vyhladaje, što siońniašni dopis rabiŭ inšy čałaviek — toj, jaki pierasłaŭ skrynšoty.
«Para zakidvać tuchłymi pamidorami i plavać u tvar!» — padsumoŭvaje aŭtar dopisu ŭ kanale Virusa.
UPD.UPD. Volha Siamaška prakamientavała situacyju ŭ siabie ŭ fejsbuku. Jana kaža, što pierasyłała skryny inšaj asobie, jakaja, u svaju čarhu, vysłała ich Virusu: «Skryny ja rabiła. … Hetyja skryny byli vysłany inšaj asobie, i heta nie Virus. Dzie jany jašče ŭspłyvali, ja nie viedaju».
UPD. Admietna, što praź niekalki hadzin da Virusa ŭsio ž dajšło, što jon spaliŭ svajho infarmatara Volhu Siamašku. Jon vydaliŭ stary dopis i apublikavaŭ novy, zamazaŭšy jaje avatarku.
Abnoŭleny skrynšot u kanale Virusa. Siamaški bolš niama
{DONATE_PAYPAL}