BMW, Siemens i inšyja niamieckija kampanii pavinilisia za ŭmacavańnie ŭłady Hitlera
Vialiki niamiecki biznes, u tym liku Siemens, BMW Group, Hugo Boss i Adidas, vystupiŭ z sumiesnaj zajavaj pra adkaznaść niamieckich kampanij za ŭmacavańnie ŭłady nacyjanał-sacyjalistaŭ na čale z Adolfam Hitleram u pieršaj pałovie XX stahodździa, piša Bi-bi-si.
Na fota, zroblenym padčas Mižnarodnaha maršu žyvych, jakoje pravodzicca ŭ Dzień pamiaci achviar Chałakostu, dziasiatki pamiatnych zapisak raskidanyja na čyhunačnych rejkach u Birkienaŭ (Aušvic-Birkienaŭ), a ŭdzielniki, zahornutyja ŭ izrailskija ściahi. Fota: Dominika Zarzycka/SOPA Images/LightRocket via Getty Images)
«Prychod da ŭłady nacyjanał-sacyjalistaŭ u 1933 hodzie byŭ by niemahčymy biez pravału tahačasnych adkaznych asob u palitycy, armii, sudovaj sistemie i ekanomicy. Niamieckija kampanii sadziejničali ŭmacavańniu ŭłady nacyjanał-sacyjalistaŭ. U pahoni za ŭłasnaj vyhadaj mnohija firmy i ich pradstaŭniki byli ŭciahnutyja ŭ hety praces. Siońnia my, jak niamieckija pradpryjemstvy, biarem na siabie adkaznaść za toje, kab zachavać pamiać pra złačynstvy časoŭ nacyzmu», — havorycca ŭ zajavie.
«Hetyja złačynstvy nahadvajuć nam, nakolki krochkaja demakratyja i jak važna znoŭ i znoŭ heta ŭśviedamlać. <…> Demakratyja žyvie ŭdziełam — i niazhodaj. Jana patrabuje pryncypaŭ i mužnaści. U 1933 hodzie i paźniej zanadta mnohija maŭčali, advaročvalisia i zapluščvali vočy. Z hetaha vynikaje naša adkaznaść — za minułaje, za sučasnaść i za budučyniu», — dadajuć aŭtary.
Jak adznačaje Die Zeit, ź inicyjatyvaj vystupić z sumiesnaj zajavaj u 80-ju hadavinu zakančeńnia Druhoj suśvietnaj vajny da niamieckich kampanij źviarnulisia kiraŭniki Bayer, BASF, Evonik i Siemens. Heta adbyłosia paśla taho, jak u studzieni hetaha hoda jany pryniali ŭdzieł u miemaryjalnaj cyrymonii, pryśviečanaj vyzvaleńniu kancłahiera Aŭšvic-Birkienaŭ.
U vyniku zajavu padpisali kiraŭniki 49 bujnych niamieckich kampanij.
Siarod ich — Adidas, BMW Group, Bosch, Deutsche Bahn, DHL Group, Hugo Boss, Henkel, Lufthansa Group, Mercedes-Benz, Rheinmetall, Uniper, Volkswagen, Porsche i inšyja.
U časy nacysckaj Hiermanii mnohija bujnyja niamieckija kampanii supracoŭničali z režymam Hitlera. Tak, na sajcie aŭtakancerna BMW jość raździeł, u jakim havorycca, što ŭ epochu nacyjanał-sacyjalizmu jon z kampanii pa vytvorčaści transpartnych srodkaŭ pieratvaryŭsia ŭ vytvorcu ŭzbrajeńnia i staŭ adyhryvać važnuju rolu ŭ vajennaj ekanomicy Hiermanii.
Niekatoryja kampanii admaŭlali svaju datyčnaść da złačynstvaŭ nacystaŭ navat praź dziesiacihodździ. Jak pisaŭ Der Spiegel, u pryvatnaści, kampanija Bayer doŭhi čas «zachoŭvała dobruju pamiać» pra staršyniu praŭleńnia Fryca ter Miejera, jaki byŭ asudžany za toje, što jaho kampanija ŭdzielničała ŭ budaŭnictvie kancentracyjnaha łahiera Monavic.