Zvalniajuć daradcu administracyi Trampa pa nacyjanalnaj biaśpiecy Majka Uołca
Niadaŭna jon trapiŭ u skandał z sakretnym čatam Signal.
Majk Uołc. Fota: AP Photo / Jose Luis Magana
Daradca administracyi Trampa pa nacyjanalnaj biaśpiecy Majk Uołc i jaho namieśnik Aleks Vonh zvolnienyja sa svaich pastoŭ, paviedamlaje telekanał Fox News sa spasyłkaj na svaje krynicy.
Vydańnie Axios piša, što Uołc pakul nie zvolnieny, ale pakinie svoj post bližejšym časam.
Aficyjna ab ich adstaŭcy pakul nie paviedamlałasia.
Nahadajem, niadaŭna ŭ ZŠA razhareŭsia skandał vakoł Majka Uołca. Jon vypadkova dadaŭ hałoŭnaha redaktara The Atlantic Džefry Hołdbierha ŭ sakretny čat Signal, dzie abmiarkoŭvalisia ŭdary pa jemienskich chusitach.
Tady Donald Tramp staŭ na bok svajho daradcy.