Kudy i jak vyjechać ź Minska na dzień, kab adpačyć? Piać idej
Adpačyć na vialikija vychodnyja možna nie zakładvajučy na toje vialikich hrošaj i šmat času. Usiaho za adzin dzień možna źjeździć u šerah cikavych miescaŭ niedaloka ad Minska. «Naša Niva» skłała śpis ź piaci takich idej — na vypadak, kali Ratamku, Viazynku i Dududki vy ŭžo bačyli.
Ilustracyjnaje fota: «Naša Niva»
Kompleks Čapskich
Siadziba Čapskich u Pryłukach. Fota: planetabelarus.by
Za 18 kiłamietraŭ ad Minska mieścicca Pryłucki pałacava-parkavy kompleks. Heta siadziba XVIII stahodździa, zakładzienaja na miescy byłoha manastyra. Apošnim pryvatnym uładalnikam parku i pałaca byŭ rod Čapskich, jaki pakinuŭ dom u 1917 hodzie.
Ciapier u pałacy dziejničaje dziaržaŭny Instytut achovy raślin — daśledčaje pradpryjemstva NAN Biełarusi. Vakoł — malaŭničyja ściežki, voziera i haspadarčyja budynki.
Ź Minska da kompleksu Čapskich možna dabracca za 25 chvilin na mašynie ci za hadzinu na hramadskim transparcie. Dla apošniaha treba sieści na №323 ci №429 aŭtobus i dajechać da prypynku «Pryłuki». Albo vykarystać maršrutku №1131, jakaja jedzie z Centralnaha aŭtavakzała.
Naturnaja placoŭka «Biełaruśfilma» kala Smalavičaŭ
Placoŭka «Biełaruśfilma» pad Smalavičami. Fota: «Anłajnier»
Niedaloka ad Smalavičaŭ jość naturnaja placoŭka «Biełaruśfilma» — miesca z anturažnymi domikami kala voziera Kamienka. Rajon, jaki vykarystoŭvaje kinastudyja, miascovyja žychary nazyvajuć prosta — «Smalavud».
Tut možna nie tolki pabłukać pa lesie i pahladzieć na vadu, ale i spynicca na noč u admysłovym hateli. Dajechać da placoŭki ź Minska zojmie kala 45 chvilin na mašynie i prykładna 1,5 hadziny na hramadskim transparcie — zaležyć ad raskładu.
Kali ŭ vas niama mašyny, jość dva šlachi: dajechać da Smalavičaŭ na elektryčcy i tam sieści na aŭtobus №410 da prypynku «Małaja Kamienka» ci ź Minska złavić maršrutku da «Małoj Kamienki» ci «Kryvoj Biarozy» (kirunak na Žodzina). Ad prypynkaŭ da kinaplacoŭki treba budzie prajścisia pieššu.
Ekaściežka «Śviatyja krynicy»
Ściežka «Śviatyja krynicy». Fota: fotobel.by
Za 40 kiłamietraŭ ad Minska mieścicca ekałahičnaja ściežka «Śviatyja krynicy». Praciahłaść ściežki — 350 mietraŭ, na šlachu — altanki, skulptury z dreva i krynicy, vadu ź jakich možna pić.
Kab dabracca tudy ź Minska, treba ci prajechać na mašynie, ci sieści ŭ maršrutku №1485š — jana daviazie vas da Bachmietaŭki, a adtul treba budzie prajścisia kala 3,5 kiłamietra. Na pačatku ekaściežki budzie bačny ŭkazalnik z asnoŭnaj infarmacyjaj pra «Śviatyja krynicy».
Etnahrafičny kompleks «Młyn» u Zasłaŭi
Kompleks «Młyn». Fota: Holiday.by
Muziej pad adkrytym niebam raskazvaje pra žyćcio Zasłaŭja ŭ pačatku XX stahodździa. Asnoŭny abjekt — paravy młyn — pabudavali ŭ 1910 hodzie na srodki zamožnaha žychara horada Miachiedka-Savickaha.
Tut ža možna naviedać Dziciačy muziej mifałohii i lesu, muziej «DOT», adziny ŭ Biełarusi Muziej malavanki i inšyja ekspazicyi.
Pahladzieć na kompleks udasca, kali prajechać mašynaj da Zasłaŭja ci złaviŭšy maršrutku, naprykład, №499. Darečy, na šlachu možacie paśpieć jašče raz zazirnuć u Ratamku.
Hidrapark «Sasnovy Bor»
Hidrapark «Sasnovy bor». Fota: «Anłajnier»
Za 50 kiłamietraŭ ad Minska, kala Radaškovičaŭ, možna adpačyć pad huki vady. Hidrapark «Sasnovy bor» — heta miesca z kanałami, vadaspadami i padviesnymi mastami.
Dajechać da jaho prosta nie tolki na mašynie, ale i aŭtobusam — pa maršrutach №432 ci №414. Vyjści treba na prypynku «Sanatoryj «Sasnovy Bor».
U samim sanatoryi pry žadańni možna i zabraniravać adpačynak. Dvuchmiesny numar u asnoŭnym korpusie budzie kaštavać 132 rubli ŭ sutki.