U Biełarusi raspaŭsiudžvajecca pravakatyŭnaja supołka Dolgb u adkaz na «pryjezd 150 tysiač pakistancaŭ». Što za jana?

Chto staić za inicyjatyvaj — niezrazumieła.

Emblema supołki

Što takoje DOLGB?

U dopisach u tyktoku i inšych sacyjalnych sacsietkach niechta sprabuje pijaryć supołku DOLGB — «doŭh adstajać asobu hramadzianaŭ Biełarusi». Jana stvoranaja 19 krasavika, ale aktyŭna pijarycca ŭ apošnija dva dni. Za hety čas jana nabrała ŭsiaho kala 100 padpisantaŭ u telehramie, ale nieviadomyja ludzi raskidvajuć spasyłku na jaje pa mnohich čatach.

Inicyjatyva źjaviłasia ŭ suviazi z mahčymym pryjezdam 150 tysiač pakistanskich mihrantaŭ u Biełaruś. Meta DOLGB zajaŭlenaja abstraktnaja — źbierahčy biełarusaŭ, a asabliva biełaruskich žančyn «ad niepavahi za źniešni vyhlad abo tradycyi», a taksama «abaranić intaresy biełarusaŭ zakonnymi šlachami».

U supołcy raspaŭsiudžvajucca ničym nie paćvierdžanyja źviestki pra toje, što pakistancy ŭžo pačali masava prybyvać u Biełaruś. Pry hetym anijakich tłumačeńniaŭ taho, jakim mienavita čynam jany adroźnivajuć hramadzian šmatmoŭnaha i šmatkulturnaha Pakistana ad hramadzian inšych krainaŭ, nie pryvodzicca.

Supołka pazicyjanuje siabie jak «ruch». Dla ŭstupleńnia treba dasłać imia, uzrost, vobłaść, poł i zhadzicca z praviłami ruchu. Taksama ad imia «rucha» była stvoranaja sietka małalikich čataŭ.

Chto moža stajać za supołkaj?

Adrazu, viadoma, možna dapuścić ruku biełaruskich ci inšych śpiecsłužbaŭ. Ale całkam imavierna, što heta nie tak.

Pa-pieršaje, u samoj supołcy nie źbirajucca anijakija asabistyja źviestki. I navat dla ŭstupleńnia ŭ «ruch» nie treba davać pra siabie asabistych źviestak, jakija b dazvolili adnaznačna vas identyfikavać. Bot zrobleny na starońnim siervisie. Śpiecsłužby zvyčajna dziejničajuć bolš radykalna, źbirajučy takija źviestki, jakija dazvolać adnaznačna zdeananimizavać karystalnikaŭ.

Pa-druhoje, supołka stvoranaja z abryvistych i chaatyčnych paviedamleńniaŭ, jakija čarhujucca z šmatsłoŭnymi i takimi ž chaatyčnymi razvažańniami. Heta dazvalaje dapuścić, što čałaviek, jaki stvaryŭ supołku, piša heta ŭsio absalutna ščyra.

Takim čynam, hety vypadak bolš nahadvaje vypadak z PVK «Rodan» — školniki i maładyja ludzi jadnajucca vakoł niejkaj papularnaj i chajpovaj ciapier temy.

Imavierna, jany sapraŭdy zaniepakojenyja pryjezdam vialikaj kolkaści inšaziemcaŭ, asabliva ŭ situacyi, kali anijakaha ŭciamnaha tłumačeńnia taho, jak heta budzie realizavana, ad uładaŭ nie pastupaje.

Pakul pa hetaj temie pracujuć tolki prapahandysty, ale atrymlivajecca, zdajecca, tak sabie. U temu ŭklučylisia i siłaviki, jakija abiacajuć represii tym, chto niapravilna kamientuje padziei.

Całkam mahčyma, što stvaralnikaŭ supołki čakajuć represii ad biełaruskich siłavikoŭ hetak ža, jak heta było sa stvaralnikami supołak PVK «Redan».

Kamientary da artykuła