U vietkaŭskim lashasie bunt z-za nizkich zarobkaŭ — daviałosia ŭmiašacca hienieralnamu dyrektaru abjadnańnia
Rabotniki vietkaŭskaha lashasa napisali kalektyŭnuju skarhu na kiraŭnictva. Hiendyrektar miascovaha HVŁHA apieratyŭna pryjechaŭ, kab «tušyć pažar».
Fota: Vietkaŭski śpieclashas
Rabotniki Vietkaŭskaha śpieclashasa 10 krasavika adpravili kalektyŭnuju skarhu na svajo načalstva. Na list adreahavaŭ hiendyrektar Homielskaha vytvorčaha lesahaspadarčaha abjadnańnia Ihar Dziahciaryk.
U toj ža dzień jon pryjechaŭ na pradpryjemstva i sabraŭ rabotnikaŭ. Razmova praciahvałasia dźvie z pałovaj hadziny, piša «Fłahštok» sa spasyłkaj na lashas.
Sudziačy pa ŭsim, rabotniki skardzilisia na nizkija zarobki, pałamanyja bienzapiły i aŭtatranspart.
«Jak vyśvietliłasia padčas znosin, šerah pytańniaŭ, uźniatych u zvarocie, byŭ paćvierdžany. Jak vynik — adrazu ŭ ramkach praviadzieńnia sustrečy kiraŭnictvu śpieclashasa byli pastaŭlenyja kankretnyja zadačy, chacia, jak vyjaviłasia, usie pytańni mahli być vyrašanyja ŭnutry kalektyvu i nie patrabujuć admysłovych namahańniaŭ», — adznačajecca ŭ paviedamleńni lashasa.
Hiendyrektar abjadnańnia daručyŭ da kanca tydnia razabracca z arhanizacyjaj ramontu transpartu Vietkaŭskaha laśnictva, zabiaśpiečyć maksimalna apieratyŭny ramont bienzapiłaŭ, davieści da viedama rabotnikaŭ pastaŭlenyja płanavyja zadańni, a «klučavoje pytańnie — dastojnyja zarobki rabotnikaŭ».
Na sajcie Vietkaŭskaha śpieclashasa jość vakansii z zarobkami. Tak, valščyku lesu abiacajuć 1000—1300 rubloŭ u zaležnaści ad vykanańnia normy vypracoŭki, majstru lesu — 900—1100 rubloŭ, elektramancioru i elektrazvarščyku — 1200—1300 rubloŭ.
Pry hetym terminova patrabujucca na pracu śpiecyjalisty pa šaści vakansijach. Na samuju nizkuju apłatu pracy — usiaho ad 700 da 1000 rubloŭ — šukajuć lesavoda.
Čytajcie taksama:
Minlashas składzie drevami ideałahičny nadpis, jaki budzie vidać z samalotaŭ
U Minlashasie raskazali, čym biełarusy nieŭzabavie zamieniać navahodnija jełki