Žychary ŽK pad Minskam usim kvartałam ratavali redkuju jaščarku. Akazałasia, heta była cacačnaja
Žychary ŽK «Pirs» razharnuli cełuju ratavalnuju apieracyju. Ale vynik akazaŭsia niečakanym.
Fota: Onliner.by
Žychary ŽK «Pirs» u Minskim rajonie razharnuli cełuju apieracyju pa vyratavańni redkaj jaščarki, jakaja zamiarzała na vulicy. To, što jaščarka nie ruchałasia, nikoha nie źbiantežyła: vyrašyli, što jana zamierzła ad choładu.
Adnak na nastupnuju ranicu jana taksama nie pačała ruchacca. Praz sutki stała zrazumieła: cudu nie zdarycca — žyviolina zroblenaja ź silikonu, piša Onliner.
Zaŭvažyła jaščarku kala padjezda dzicia, raskazała pra znachodku maci, a taja vykłała fatahrafiju ŭ ahulny čat z pytańniem, chto zhubiŭ žyviołu. Na paviedamleńnie nichto nie adhuknuŭsia, a praź niekalki hadzin jaščarka zastavałasia ŭsio na tym ža miescy.
«I tut užo pačalisia pieražyvańni, što jana zamierźnie, dzie haspadary, moža, chto-niebudź voźmie jaje na pieratrymku. U nas u cełym ludzi ŭ kvartale vielmi kłapatlivyja — nie raz užo ratavali katoŭ z kacianiatami, prystrojvali ich», — raskazała žycharka «Pirsa» Darja.
U čacie adhuknulisia zavodčyki, u jakich jość svaje jaščarki. Jany vyznačyli, što heta biełaja ahama — vielmi redki vid. Davoli chutka znajšoŭsia čałaviek, jaki byŭ hatovy ŭziać jaje ŭ svabodny teraryum, ale atrymlivałasia pryjechać u jaho tolki na nastupny dzień.
Tak vyhladaje žyvoje ahama
«Tamu jon prasiŭ na dzień uziać jaje dadomu ŭ słoik, kab nie zamierzła — inakš zahinie, škada. U mianie jość kotka, tamu kacianiat ja nikoli nie mahła ŭziać sabie. A tut — vyrašyłasia. Znajści trochlitrovy słoik nie prablema», — uspaminaje Darja.
Na vyratavańnie žyvioliny jana adpraŭlałasia ŭžo ŭviečary. Jaščarka vyhladała zamierzłaj, uvohule nie ruchałasia. Ekśpierty mierkavali, što jana ŭpała ŭ anabijoz.
«Kali ja padtałkivała jaje ŭ słoik, u jaje pačali varušycca łapki — i ŭsie ŭzradavalisia, što jana žyvaja i atrymajecca jaje vyratavać. Na vyprastanych rukach ja paniesła jaje dadomu. Bo, praŭda, nie viedała, ukusić jana ci nie, jadavitaja ci niejadavitaja, jak adreahuje na takija pasiahalnictvy. Adviała dadomu — i mnie pačali pisać, jak pravilna za joj dahladać.
Pastaviła pobač z batarejaj, zaharnuła ŭ ručnik vialiki butyl kala jaje, kab jana adtajała. A ŭsie susiedzi družna pytalisia, jak spravy ŭ jaščarki», — kaža Darja.
Dziaŭčyna pryznajecca, što minimalnyja sumnieńni ŭ jaje byli — zanadta mutnymi ŭ jaščarki zdavalisia vočy. A raptam heta cacka? Ale muž zapeŭniŭ: tak, heta ŭsio z-za stanu, nie moža cacka być takoj realistyčnaj.
Tak vyhladaje cacka
Vyśvietliłasia — moža. To, što i na ranicu jana nie pačała ruchacca, uzmacniła sumnieńni. Da taho ž susiedzi ŭzhadali, što dzieci hulali ź jaščarkaj z adarvanaj nožkaj — heta było jaje paznavalnaj rysaj, a niechta dasłaŭ u čat spasyłku na kramu ź vielmi padobnaj cackaj.
Bolš detalovaje vyvučeńnie pakazała: heta sapraŭdy silikon — łapy mocna raściahvalisia. Padabienstva ŭzmacniaŭ pył ad znachodžańnia na vulicy. Paźniej znajšoŭsia i maleńki haspadar cacki. Darečy, nožku jana zhubiła ŭ sapraŭdnaj sutyčcy z chatniaj kotkaj.
«Ja napisała susiedziam: dziakuj usim za kłopat, sutki my ratavali cacku. Ale dumaju, što heta najlepšy vynik hetaj historyi. Śmiajaŭsia ŭvieś kvartał i śmiajecca dahetul», — adznačyła Darja.