«U dziaržavy niama hrošaj. Ich treba znajści». Supracoŭnik ahienctva nieruchomaści raskazaŭ pra niadaŭnija pieratrusy

Supracoŭnik adnaho z ahienctvaŭ nieruchomaści raskazaŭ «Salidarnaści», jak prachodzili niadaŭnija pieratrusy ŭ ahienctvach i z čym heta moža być źviazana.

— Mnie dakładna viadoma pra pieratrusy ŭ piaci ahienctvach. Ź ich adno nievialikaje, ale čatyry — vielmi bujnyja, u jakich pracuje pa niekalki sotniaŭ čałaviek. U adnym ź ich kaliści daviałosia pracavać i mnie, — adznačyła ŭ ekspres-kamientary «Salidarnaści» krynica ź Biełarusi. — Ale ja miarkuju, što pieratrusy byli ŭ bolšaj kolkaści ahienctvaŭ.

Zaraz sprabujem udakładniać infarmacyju, ale vy ž razumiejecie, što takimi navinami pa telefonie nichto nie dzielicca. Adnak z časam, viadoma, usio daviedajemsia.

Z zatrymanych mnie asabista mnohija znajomyja, bo ja vielmi daŭno pracuju ŭ hetaj śfiery.

Hetyja pieratrusy, pa śviedčańniach supracoŭnikaŭ hetych ahienctvaŭ, nie byli padobnyja na spantannyja. Jany tak i kažuć: «Vidać, što da apieracyi rychtavalisia, źbirali infarmacyju».

U maim ahienctvie ŭsio cicha.

Na samaj spravie, da našaj śfiery pavyšanuju ŭvahu prajaŭlajuć užo daŭno. Pryniali zakon «Ab ryełtarskaj dziejnaści», u kancy krasavika pavinny pryniać źmieny ŭ zakon ab strachavańni, z-za jakich ryełtary mohuć stracić častku svaich dachodaŭ. Užo byli i «pakazalnyja łupcoŭki» z pazbaŭleńniem licenzii niekalkich ahienctvaŭ. Łahična vykazać zdahadku, što nastupnym krokam mahło być mienavita heta, na žal.

— Jak dumajecie, što mohuć ad vas chacieć?

— Pakolki pryjšli da samych bujnych hulcoŭ, dumaju, havorka idzie mienavita pra vypłatu padatkaŭ. Kali heta tak, to ŭ mienšaj stupieni pacierpiać ryełtary i ahienty, u bolšaj stupieni mohuć paciarpieć zasnavalniki, najomnyja dyrektary, buchhałtary — usie, chto maje dačynieńnie da padatkaabkładańnia. Ryełtar u asnoŭnym akazvaje jurydyčnuju dapamohu.

Ale navat kali ŭ orhanaŭ jość pytańni pa vypłacie padatkaŭ, u lubym vypadku ŭryvacca ŭ ofis, ładzić «maski-šou», kłaści ŭsich tvaram u padłohu — heta samadurstva. A ŭsie, chto mnie raskazvaŭ pra toje, što adbyłosia, paćvierdzili, što mienavita ŭryvajucca, usich układvajuć, a potym užo pačynajuć raźbiracca.

U kožnym vypadku, kali i paćvierdzicca, što jość skład złačynstva, jano ŭsio adno ekanamičnaje. Heta nie zabojcy i nie terarysty, kab tak rabić ź ludźmi.

Prosta ŭ dziaržavy niama hrošaj. Ich treba znajści i, kali spatrebicca, vybić. Situacyja žudasnaja, viadoma. Šmat chto ŭ panicy.

— Vy aścierahajeciesia za svaju svabodu?

— Ja žyvu ŭ Biełarusi. Naturalna, my ŭsie prajšli praz 2020 hod. Paśla jaho ŭ Biełarusi nie bajacca niemahčyma.

Kamientary da artykuła