U Biełarusi na čatyry šluby prychodziacca try razvody
Nacyjanalny statystyčny kamitet padzialiŭsia statystykaj za 2024 hod pa šlubach i razvodach siarod biełarusaŭ.
U Biełarusi žančyny ŭpieršyniu vychodziać zamuž u siarednim u 26,7 hoda, a mužčyny — u 28,9 hoda. Hod tamu było 26,5 i 28,8 hoda adpaviedna.
Usiaho ŭ 2024 hodzie ŭ krainie było zarehistravana bolš za 46 242 šluby. Ź ich upieršyniu źviazali siabie šlubam 28 146 žančyn i 29 776 mužčyn. Navat va ŭzroście starej za 65 hadoŭ znajšli svaju luboŭ i zarehistravali adnosiny 633 žančyny i 944 mužčyny.
U toj ža čas raspałasia 34 866 šlubaŭ. Najčaściej razvodzilisia tyja pary, jakija byli siamjoj ad 1 hoda da 4 hadoŭ: usiaho takich było 8701. Niamała sužencaŭ «nie syšlisia charaktarami» i paśla 20 hadoŭ aficyjnaha sumiesnaha žyćcia — 5472 pary.
1307 zamiežnic vyjšli zamuž za biełarusaŭ. Na pieršym miescy pa kolkaści — rasijanki (956), za imi iduć ukrainki (149) i hramadzianki Kazachstana (32). Zamykajuć piaciorku niaviesty ź Litvy i Łatvii.
U toj ža čas biełaruski stali žonkami 1856 zamiežnikaŭ. Najčaściej heta byli hramadzianie Rasii (957), Litvy (73) i Turcyi (69). Taksama ŭ topie siarod žanichoŭ — hramadzianie Ukrainy i Kazachstana.