Prakapienia pradaŭ kryptabiržu Currency ź biełaruskimi karaniami inviestaram
Inviestycyjnaja kampanija VP Capital, jakaja naležyć biełaruskamu pradprymalniku Viktaru Prakapieniu, pradała kryptabiržu Currency.com hrupie inviestaraŭ, pradstaŭlenych kampanijaj CXNEST Ltd, piša Office.life sa spasyłkaj na Tradingview.
Hetaja kampanija była zarehistravana ŭ kastryčniku 2023 hoda na Kipry. Pieramovy ab prodažy praciahvalisia 18 miesiacaŭ, a suma ździełki nie raskryvajecca.
Pradstaŭnik CXNEST Ltd Kanstancin Anisimaŭ adznačyŭ, što jany bačać značny patencyjał u raźvićci płatformy i płanujuć inviestavać u maštabnaje pašyreńnie jaje mahčymaściaŭ i kamandy. Źmiena ŭłaśnikaŭ kryptabiržy nie paŭpłyvaje na jaje pracu, i karystalniki Currency.com praciahnuć karystacca bieśpierabojnym dostupam da płatformy.
Ździełku ŭchvalili 28 dziaržaŭnych rehulataraŭ u ZŠA i Kamisija pa finansavych pasłuhach Hibrałtara. Currency.com atrymała licenziju Hibrałtara ŭ 2020 hodzie i vyjšła na amierykanski rynak u 2022-m.
U 2022 hodzie VP Capital vyłučyła z struktury Currency.com biełaruskaje padraździaleńnie, jakoje stała asobnaj kampanijaj pad nazvaj «Dzieńhi Kom». U 2023 hodzie hetaja kampanija była pradadziena hrupie biełaruskich pradprymalnikaŭ. Hetaja ździełka aznačaje zaviaršeńnie vychadu VP Capital z kryptaprajektaŭ. Raniej, u 2021 hodzie, kampanija vykupiła doli partnioraŭ u prajektach Capital.com i Currency.com, paśla čaho ŭ 2022 hodzie pradała svaju dolu ŭ kampanii Banuba mieniedžmientu kampanii.