Paśla napadak praŭładnych aktyvistaŭ u Minsku zakryli vystavu «Biełaruski biestyjaryj»
Praca vystavy «Biełaruski biestyjaryj» u halerei «Mastactva» była zapłanavana da 22 sakavika, ale siońnia ŭ sacsietkach prajekta źjaviŭsia post ab zakryćci ekspazicyi. Naviedać jaje možna było ŭsiaho dva dni.
Fota z vystavy «Biełaruski biestyjaryj». Fota: «Źviazda»
«Siabry! Pa niezaležnych ad nas pryčynach vystava Biełaruskaha biestyjaryja zakryta. Ekskursij bolš nie budzie», — paviedamili arhanizatary.
Aŭtary vystavy dadali, što aŭdyjahid pa ekspazicyi zrobiać ahulnadastupnym.
Fota: «Źviazda»
12 sakavika, na druhi dzień ad adkryćcia vystavy, temaj ekspazicyi aburyłasia praŭładnaja aktyvistka i mastačka Śviatłana Žyhimont.
«Cudoŭnyja vystavy prachodziać u Pałacy ŭ Vialiki post», — napisała jana.
Jaje niezadavolenaść padchapili Volha Bondarava i Alaksandr Płavinski. Jany ŭhledzieli ŭ tematycy biełaruskich mifaŭ i kazak satanizm i nieapahanstva.
«Zastałosia tolki aśviacić vystavačnuju zału halerei mastactva i niekatorych niedamastakoŭ, apantanych djabłam, śviatoj vadoj. Zaraz na hetym miescy rychtujecca novaja ekspazicyja karcin», — napisaŭ Płavinski i apublikavaŭ foty taho, jak vystaŭku zdymajuć.
Zaviaršeńnie vystavy «Biełaruski biestyjaryj». Fota: Płavinskij Aleksandr — Infośpiecnaz / «Vkontaktie»