Hihin raskazaŭ, što źmienicca praktyka pakarańnia za raspaŭsiud «ekstremisckich» materyjałaŭ
Łukašenkaŭskija ekśpierty źbirajucca ŭrehulavać niekatoryja momanty ŭ tym, što jany buduć ličyć złačynnym raspaŭsiudam materyjałaŭ, jakija ŭłady abviaščajuć ekstremisckimi, a što — nie. Pra heta biez dadatkovych padrabiaznaściaŭ napisaŭ prapahandyst i dyrektar Nacyjanalnaj biblijateki Biełarusi Vadzim Hihin.
Prapahandysty ŭ akupavanym Mielitopali. Fota: Jaŭhien Balicki
Jakija mienavita heta buduć źmieny, pakul nie viadoma, ale kantekst sprečki daje nadzieju, što havorka nie pra zakručvańnie hajek.
Uvahu Hihina i inšych prapahandystaŭ pryciahnuŭ vychad knihi rasijskaha impierskaha historyka Alaksandra Dziukava «Nieviadomaja dakumientalnaja spadčyna Kanstancina Kalinoŭskaha. Z archiŭnych pošukaŭ 2022—2024 hadoŭ». Siarod krynic, na jakija spasyłajecca Dziukaŭ, — pracy Siarhieja Abłamiejki, apublikavanyja na «Radyjo Svaboda», abvieščanaha łukašenkaŭskimi ŭładami ekstremisckim.
Siarod prapahandystaŭ stali hučać papiaredžańni, što takuju knihu nielha nabyvać biełarusam — bo heta moža traktavacca jak raspaŭsiud «ekstremisckich» materyjałaŭ.
Suprać takoha padychodu horača vystupiŭ Ryhor Azaronak, jaki zaŭvažyŭ, što «navukovaje vydańnie, na toje i navukovaje vydańnie, što ŭ im dazvalajecca, naprykład, spasyłacca na «Majn Kampf» pry daśledavańni fašyzmu», — pryvioŭ svoj arhumient jon.
Telehram-kanał «Hrafač», źviazany ź ministram infarmacyi Maratam Markavym, zapiarečyŭ: u ciapierašnim zakanadaŭstvie niama nijakich vyklučeńniaŭ dla navukovych ci niejkich inšych metaŭ, tamu farmalna kniha parušaje zakanadaŭstva Biełarusi.
Da abmierkavańnia dałučyŭsia i Vadzim Hihin.
«Zaraz jakraz idzie ekśpiertnaja praca pa ŭparadkavańni procidziejańnia ekstremisckim materyjałam. U vyniku ŭsie sprečnyja momanty buduć urehulavany, u tym liku i paradak cytavańnia ŭ navukovych publikacyjach», — adkryŭ jon insajd.
U Biełarusi raspaŭsiudam ekstremizmu ličycca lubaja spasyłka na niezaležnyja resursy, jakija ŭłady abviaščajuć ekstremisckimi.