«Ci adkažuć za tych, chto zadychnuŭsia?» Rasijskija vajenkary pišuć ab pravale šturmu Sudžy praz hazapravod
8 sakavika źjaviłasia paviedamleńnie, što ranicaj kala sotni vajskoŭcaŭ rasijskaj armii prajšli pa hazapravodzie «Prahres» u tył ukraincaŭ u rajonie Sudžy. Spačatku padavałasia, što hetaja akcyja była paśpiachovaj, ale paśla ŭkrainskija krynicy zajavili pra razhrom rasijskaha śpiecnaza. Ciapier rasijskija vajenkary padajuć niekatoryja padrabiaznaści.
Rasijskija vajskoŭcy pieramiaščajucca pa hazapravodzie. Fota: Z-kanał
Adzin z takich vajenkaraŭ Uładzimir Ramanaŭ, aŭtar telehram-kanała «Romanov Łajt», napisaŭ, što ideju z truboj zajaviła «adno padraździaleńnie, jakoje jašče z časoŭ Aŭdziejeŭki vielmi lubić pijar».
Rasijski vajskoviec pieramiaščajecca pa hazapravodzie. Fota: Z-kanał
Maŭlaŭ, hetaje padraździaleńnie «zajaviła, što ŭsio padrychtavała: vientylacyju, adstojniki, vadu i pravijant, suviaź i h.d.». Ale na praktycy ŭsio akazałasia nie tak bliskuča.
«Vynik usie na miescach viedajuć. Pytańnie — ci adkažuć za tych, chto zadychnuŭsia?», — hnieŭna pytaje vajenkar.
Tym časam u Hienštabie USU aficyjna zajavili:
«Zvodnyja dyviersijna-šturmavyja hrupy praciŭnika pieramiaścilisia pa vietcy hazapravoda z metaj zamacavacca na ŭskrainach horada Sudža ŭ Kurskaj vobłaści».
Adnak, jak śćviardžajecca, hetyja hrupy byli svoječasova vyjaŭlenyja, pa ich nanieśli ŭdary roznymi najaŭnymi srodkami.
«Ciapier rasijskija śpiecnazaŭcy vyjaŭlajucca, błakujucca i źniščajucca. Straty praciŭnika ŭ rajonie Sudžy vielmi vialikija», — śćviardžajecca ŭ paviedamleńni ŭkrainskaha Hienštaba.
Dyjamietr hazapravoda «Prahres» składaje 1,4 mietra. Pa im praz Ukrainu raniej išoŭ tranzit rasijskaha hazu ŭ Jeŭropu, ale 1 studzienia 2025 hoda pastaŭki praz hety hazapravod spynilisia.
Čytajcie taksama:
«Situacyju źmianili vajskoŭcy z KNDR». Što ciapier adbyvajecca ŭ Kurskaj vobłaści
USU paviedamlajuć pra źniščeńnie «vialikaj hrupy dyviersantaŭ» u tuneli
100 rasijan dajšli da Sudžy pa trubie hazapravoda i nie ŭzarvalisia