«Važyła da 30 kiłahramaŭ». Ukrainskuju žurnalistku, jakaja pamierła ŭ rasijskim pałonie, katavali

Žurnalisty «Ślidstvo.Info» vyśvietlili, što da śmierci ŭkrainskuju žurnalistku Viktoryju Roščynu mocna katavali. Na jaje ciele byli nažavyja ranieńni, važyła dziaŭčyna da 30 kiłahramaŭ, a supracoŭniki rasijskaj kałonii chavali jaje ad pravierak.

Viktoryja Roščyna

Pra śmierć 28-hadovaj ukrainskaj žurnalistki Viktoryi Roščynaj stała viadoma ŭ kastryčniku 2024 hoda. Zatrymali jaje letam 2023 hoda padčas padrychtoŭki repartažu na akupavanych rasijanami terytoryjach.

Žurnalisty «Ślidstvo.Info» razam z arhanizacyjaj «Reparciory bieź miež» i kalehami ź miedyja «Suśpilnie» i «Hraty» vyśvietlili, što rasijanie spačatku schapili Viktoryju i ŭtrymlivali ŭ zaścienkach na akupavanaj terytoryi Zaparožskaj vobłaści, a zatym pieravieźli ŭ Tahanroh.

U turmach jaje trymali biez aficyjnych abvinavačvańniaŭ, śćviardžaje Iryna Dzidzienka, staršaja hrupy prakuroraŭ Ofisa hienieralnaha prakurora pa spravie Roščynaj.

Sukamiernica žurnalistki raskazała, što z toj adbyvałasia ŭ tahanrohskim SIZA №2. Na ciele Roščynaj byli nažavyja ranieńni, ź jakimi jana prybyła paśla ŭtrymańnia ŭ akupacyi.

«Ja bačyła na jaje ciele niekalki rubcoŭ — dakładna na ruce i nazie. U jaje była nažavaja rana, nu, prama rubiec śviežy. Pamiž kiściu i łokciem u miakkich tkaninach. I rubiec byŭ dzieści santymietry try», — raskazała jana.

Akramia nažavych parezaŭ, Viktoryju taksama katavali tokam.

«Viedaju, što tokam [katavali] nie adzin raz. I jana nie kazała kolki razoŭ, ale kazała, što była ŭsia siniaja», — uspaminaje pałonnaja sukamiernica Viktoryi, udakładniajučy, što tok mahli padłučać Viktoryi da vušej.

Pa jaje słovach, žurnalistka admaŭlałasia ad ježy i źviartałasia pa dapamohu da turemščykaŭ. Z časam jana pačała mocna chudnieć i stała važyć «da 30 kiłahramaŭ».

Kali rabotniki SIZA zaŭvažyli, što Viktoryja chudnieje, da jaje ŭ kamieru prychodziŭ načalnik kałonii i pravodziŭ ź joj hutarki. Jana ŭvieś čas nastojvała na tym, kab jaje vyzvalili, pamianiali, abo departavali.

Sa słoŭ śviedki, padčas ich utrymańnia była pravierka rasijskim ambudsmienam. Viktoryju chavali ad pravierki i pieravodzili na inšy pavierch u zakryty pakoj.

Apošni raz žurnalistku bačyli 8 vieraśnia 2024 hoda, kali jaje vyvieli z kamiery ŭ nieviadomym kirunku.

Viktoryju Roščynu rasijskija vajskoŭcy i siłaviki zatrymlivali dva razy — u sakaviku 2022 hoda padčas pajezdki ź Biardzianska ŭ Maryupal (tady paśla 10 dzion aryštu jaje adpuścili) i ŭ žniŭni 2023 hoda, kali žurnalistka pajechała praz Polšču na padkantrolnyja Rasii terytoryi Zaparožskaj vobłaści dla padrychtoŭki repartažu.

Apošni raz jana vychodziła na suviaź 3 žniŭnia 2023 hoda.

Kamientary da artykuła