Mierc abiacaje ŭzmacnić niezaležnaść ad ZŠA i sumniavajecca ŭ budučyni isnavańnia NATA
Budučy kancler Hiermanii zajaviŭ, što administracyja Trampa nie kłapocicca pra Jeŭropu i zbližajecca z Rasijaj. Na jaho dumku, kantynient pavinien terminova ŭzmacnić svaju abaronu, piša Politico.
Frydrych Mierc. Fota: Kay Nietfeld picture alliance / Getty Images
Pra heta Mierc zajaviŭ u efiry niamieckaha telebačańnia ŭ niadzielu ŭviečary, cytuje Politico.
«Maim absalutnym pryjarytetam budzie bolš chutkaje ŭmacavańnie Jeŭropy, kab krok za krokam my mahli sapraŭdy dasiahnuć niezaležnaści ad ZŠA», — skazaŭ Mierc.
Palityk, viadomy jak prychilnik NATA, dadaŭ, što jeŭrapiejcam moža spatrebicca vypracavać svaju alternatyvu Aljansu.
«Mnie vielmi cikava pahladzieć, jak my ruchajemsia da samitu NATA ŭ kancy červienia. Ci budziem my ŭsio jašče kazać pra NATA ŭ jaho ciapierašnim vyhladzie, ci nam daviadziecca značna chutčej stvarać niezaležnuju jeŭrapiejskuju abaranazdolnaść», — skazaŭ jon.
Mierc taksama dadaŭ, što nikoli nie dumaŭ, što jamu pryjdziecca kazać takija rečy. Ale paśla zajavaŭ Trampa na minułym tydni jamu stała zrazumieła, što novaja administracyja prezidenta ZŠA «abyjakava da losu Jeŭropy».
Pa jaho mierkavańni, Rasija i ZŠA jadnajucca «nad hałovami Ukrainy, a značyć, nad hałovami Jeŭropy». Budučy kancler Hiermanii taksama nie ŭpeŭnieny, jakoj budzie pazicyja ZŠA adnosna vajny va Ukrainie ŭ bližejšyja tydni i miesiacy.
U Hiermanii Kansiervatyŭny błok CHDS/CHSS nabraŭ najbolšuju kolkaść hałasoŭ pa vynikach vybaraŭ 23 lutaha. Čakajecca, što Mierc stanie nastupnym kancleram krainy.
Čytajcie taksama:
Frydrych Mierc padtrymaŭ Zialenskaha
Zarabiŭ, viarnuŭsia, pieramoh. Chto taki Frydrych Mierc, jaki stanie novym kancleram Hiermanii