Saudaŭcy budujuć fantastyčny miehapolis «Linija», kudy možna budzie zasialić usiu Biełaruś. Košt — $1 tryljon ŠMAT FOTA

U Saudaŭskaj Aravii pačaŭsia pieršy etap budaŭnictva miehaambicyjoznaha prajektu haryzantalnaha chmaračosu ź lustranym fasadam pad nazvaj «Linija», čyja zapłanavanaja daŭžynia budzie pieravyšać 100 kiłamietraŭ, što maje stać najbujniejšym urbanistyčnym ekśpierymientam u śviecie. Voś što viadoma pra pieršy etap i jakija składanaści mohuć uźniknuć pry budaŭnictvie.

Zapłanavany vyhlad haryzantalnaha lustranoha miehapolisu «Linija». Fota: Neom

Saudaŭskaja Aravija aficyjna prystupiła da ŭźviadzieńnia vielizarnaha i vysokatechnałahičnaha haryzantalnaha chmaračosa-miehapolisa «Linija» — adnaho z samych ambicyjoznych architekturnych prajektaŭ u historyi čałaviectva, paviedamlaje partał New Atlas.

Pieršy etap prajekta «Linija» pad nazvaj Hidden Marina («Prychavanaja prystań») budzie raźličany na 200 tysiač žycharoŭ. Tam pabudujuć 80 tysiač žyłych kvater i 9 tysiač haściničnych numaroŭ, a taksama handlovyja i dziełavyja zony. Miž rajonami budzie kursiravać elektratranspart, a ŭ samim horadzie buduć usie nieabchodnyja abjekty — škoły, pažarnyja stancyi, palicejskija ŭčastki.

Technałahičnaj asnovaj Hidden Marina stanie štučny intelekt, jaki budzie kantralavać enierhaspažyvańnie, zapaŭnialnaść budynkaŭ, biaśpieku i inšyja haradskija pracesy. Infrastruktura budzie ŭklučać šyrokija zialonyja nasadžeńni i viertykalnyja sady dla palapšeńnia pavietra i naturalnaha achaładžeńnia ŭnutranaj prastory. Dla ekanomii vady i ŭstojlivaha raźvićcia buduć ustalavanyja pieradavyja sistemy zboru daždžavoj vady, pierapracoŭki ściokavych adkidaŭ i razumnaha arašeńnia.

Zapłanavany vyhlad Hidden Marina znutry. Fota: Neom

Zapłanavany vyhlad Hidden Marina znutry. Fota: Neom

Zapłanavany vyhlad Hidden Marina znutry. Fota: Neom

Hidden Marina zojmie 2,5 km u daŭžyniu i 500 m u vyšyniu, što amal supastaŭna z vyšynioj samaha vysokaha budynka ŭ śviecie — chmaračosa Burdž-Chalifa ŭ Dubai. Płošča zabudovy składzie 21 miljon kvadratnych mietraŭ, što bolš čym u 60 razoŭ pieravyšaje płošču zabudovy Burdž-Chalify.

Kanstrukcyja budzie składacca z modulnych žyłych błokaŭ ź lustranymi fasadami, na jakich budzie adbivacca navakolny pustynny łandšaft. Hety vybar dyzajnu, pavodle zabudoŭščykaŭ, palapšaje estetyku, a taksama dapamahaje rehulavać tempieraturu ŭ horadzie, zabiaśpiečvajučy bałans pamiž sučasnaj architekturaj i ekałahičnaj harmonijaj.

Hidden Marina budzie ŭklučać u siabie vialikuju arku dla prachodu kruiznych łajnieraŭ i inšych karabloŭ. Fota: Neom

Zapłanavany vyhlad Hidden Marina ź lustranymi fasadami i vialikaj prystańniu. Fota: Neom

U budaŭnictvie Hidden Marina zadziejničana 140 tysiač rabočych, jakim dapamahajuć robaty, a inviestycyi ŭ infrastrukturu užo dasiahajuć $140 miljardaŭ. Pavodle inviestaraŭ i zabudoŭščykaŭ, Hidden Marina budzie hatovaja da 2030 hoda i navat prymie matčy čempijanatu śvietu pa futbole 2034 hoda.

Takim zabudoŭščyki Hidden Marina bačać futbolny stadyjon, jaki źbirajecca pryniać matčy čempijanatu śvietu pa futbole 2034 hoda. Fota: Neom

I heta tolki pieršy etap budaŭnictva. Zychodziačy z aficyjnych płanaŭ, uvieś całkam miehapolis «Linija» pa daŭžyni budzie pieravyšać 100 km i budzie kaštavać bolš za tryljon dalaraŭ (heta nie kančatkovaja suma). Čakajecca, što paśla zaviaršeńnia budaŭnictva i ŭsich padrychtovak (u 2045 hodzie) «Linija» zmoža źmiaścić u siabie 9 miljonaŭ žycharoŭ, što ekvivalentna kolkaści nasielnictva Biełarusi.

Adnak na šlachu realizacyi zadumy isnujuć surjoznyja składanaści. Pa-pieršaje, maštab, składanaść i vysoki košt prajektu nie ŭsialajuć dastatkovaj upeŭnienaści mnohim inviestaram, što zapavolvaje prytok hrošaj u budaŭnictva.

Pa-druhoje, ekśpierty zaniepakojenyja tym, što dla budaŭnictva «Linii» spatrebicca kala 20% suśvietnych zapasaŭ stali, što, na mierkavańnie mnohich, źjaŭlajecca niedazvalalnaj raskošaj i nierazumnym marnavańniem resursaŭ.

Pa-treciaje, kancepcyja horada-linii, raściahnutaha ŭzdoŭž centralnaj mahistrali, praduhledžvaje raŭnamiernaje raźmierkavańnie centraŭ zaniataści nasielnictva. U advarotnym vypadku patok ludziej niepaźbiežna budzie skiroŭvacca tolki ŭ niekalki łakalnych zon, što budzie stvarać transpartnyja kałapsy. 

I pa-čaćviortaje, uźnikajuć aściarohi datyčna ŭmoŭ pracy i žyćcia 140 tysiač rabočych, značnaja častka ź jakich źjaŭlajecca mihrantami, a sama Saudaŭskaja Aravija nie słavicca zachavańniem pravoŭ čałavieka.

Naprykład, u susiednim Katary padčas čempijanatu śvietu pa futbole 2022 hoda siarod mihrantaŭ-rabočych mieli miesca šmatlikija vypadki niavypłačanych zarobkaŭ, niezakonnych zboraŭ za pracaŭładkavańnie pamieram $1300 (ich byli vymušanyja zapłacić sotni tysiač rabočych), traŭmy i navat śmierci. Ažno da 2020 hoda mihranty-rabočyja, jakija budavali infrastrukturu i abjekty da čempijanatu, byli abmiežavanyja ŭ mahčymaści zvolnicca ci pakinuć Katar.

Zapłanavanaja daŭžynia ŭsiaho miehapolisa «Linija» (zvyš 100 kiłamietraŭ). Fota: Neom

Kamientary da artykuła