Palitviaźnia Naliŭku padmanuŭ palitviazień Abramuk — zabraŭ padtrymku, jakuju toj pavinien byŭ atrymać pa vyzvaleńni
Były palitviazień Siarhiej Naliŭka, jaki bolš za try hady pravioŭ za kratami, kaža, što jaho padmanuŭ inšy były palitviazień, prysabiečyŭšy dapamohu ad «Bajsoła». Havorka pra Dźmitryja Abramuka — jon zapomniŭsia hučnaj historyjaj, kali zakruciŭ raman z supracoŭnicaj milicyi padčas adbyćcia pakarańnia na chimii.
Siarhiej Naliŭka i Dźmitryj Abramuk. Fota: asabisty archiŭ hieroja, Facebook Dźmitryja Abramuka
Viersija Siarhieja Naliŭki
Abodva palitviaźni prachodzili pa bresckaj «karahodnaj spravie».
Abramuk zapomniŭsia hučnaj historyjaj: jon zakachaŭsia ŭ supracoŭnicu chimii. Kachańnie ŭ vyniku nie atrymałasia, a paśla vyzvaleńnia Dźmitryj asieŭ u Varšavie. U listapadzie 2024 jaho zatrymlivali padčas matču «Lehii» ź minskim «Dynama» i zabaranili chadzić na futbolnyja matčy.
Voś, što raskazaŭ «Našaj Nivie» Siarhiej Naliŭka:
«Kali ja vyzvaliŭsia 26 kastryčnika 2024 hoda, to napisaŭ u «Bajsoł» nakont materyjalnaj dapamohi. Mnie chutka adkazali, što mnie dapamohuć, i vydzielili hrošy, davoli vialikuju sumu».
Pakolki tady Naliŭka jašče byŭ u Biełarusi, dla atrymańnia hrošaj jamu było treba znajści zamiežnuju kartku.
«Ja ŭzhadaŭ, što Dźmitryj Abramuk, ź jakim my razam siadzieli na chimii, žyvie ŭ Varšavie — pra heta raskazaŭ inšy chimik.
Ja napisaŭ Abramuku i zapytaŭsia, ci zdoleje jon mnie dapamahčy. Jon pahadziŭsia. Kinuŭ mnie rekvizity dla pieravodu, ja pierakinuŭ ich «Bajsołu» — i jany adrazu pieraviali hrošy. Ja pišu Abramuku: maŭlaŭ, pravier, ci dajšli.
Paśla hetaha jon adrazu mianie paŭsiul zabłakavaŭ. Ja zrazumieŭ, što jon mianie kinuŭ.
Siarhiej Naliŭka. Fota: archiŭ surazmoŭcy
Ja napisaŭ čałavieku, jaki padkazvaŭ mnie, što Abramuk u Polščy. Jon mnie adkazaŭ, što Abramuk jaho vydaliŭ ź siabroŭ dy źnik. Paśla ludzi ŭ Varšavie sprabavali jaho šukać, ale nichto nie zdoleŭ znajści. Jon chavajecca ad ludziej.
Mnie kryŭdna, bo ja raźličvaŭ na hetyja hrošy zrabić vizu i pajechać za miažu. A atrymałasia, što pasadzili adny, a jak vyzvaliŭsia, dyk kinuli svaje ž».
Andrej Stryžak raspavioŭ «Našaj Nivie», što pra składanaści z Abramukom jon viedaje.
«Ź im byli prablemy. Dokazaŭ i padćviardžeńniaŭ u mianie niama, ale pa pavodzinach čałavieka možna dapuścić, što jon maje prablemy z zaležnaściami i patrabuje dapamohi», — kaža kiraŭnik «Bajsoła».
Znajomyja Abramuka raskazali, što ŭ listapadzie 2024 hoda jon pisaŭ usim ludziam sa svajho śpisa fejsbuk-siabroŭ (navat nieznajomym) i prasiŭ pazyčyć hrošaj.
Skrynšot adnaho z paviedamleńniaŭ, jakija Abramuk dasyłaŭ siabram u fejsbuku
Siarhiej Naliŭka kaža, što ŭ razmovie z ahulnym znajomym Dźmitryj zapeŭnivaŭ, što nie viedaje Naliŭku ŭvohule. Siarhiej dasłaŭ nam hałasavyja paviedamleńni, u jakich Dźmitryj admaŭlaje fakt jaho znajomstva ź im.
Taksama dasłaŭ nam skrynšoty, jakija paćviardžajuć, što jon kamunikavaŭ ź Dźmitryjem Abramukom.
Viersija Dźmitryja Abramuka
U Dźmitryja Abramuka viersija inšaja. Jon kaža, što pra «Bajsoł» jaho nichto ni pra što nie papiaredžvaŭ i što ŭ niejki momant jamu prosta dasłali hrošy na rachunak:
«Mnie nichto nie kazaŭ, što pryjduć niejkija hrošy. Niejki čałaviek napisaŭ, kaža: daj rachunak dla atrymańnia dapamohi «Bajsoła». Ja navat nie zrazumieŭ, što heta Naliŭka. Nu i mnie ŭ vyniku dasłali hrošy — dziakuj, dapamahli, ja palitviazień i maju na heta prava. I viartać ja ničoha nie budu.
Ja nie davaŭ nikomu dazvołu atrymlivać hrošy na svoj rachunak. I čamu ŭvohule sa mnoj nie źviazaŭsia «Bajsoł» papiarednie? Skinuli? dziakuj, što dapamahli.
Kali jon pryjedzie ŭ Polšču, ja jaho źnišču. Kali budziecie jamu pisać, to skažycie, kab pić kidaŭ i nie kazaŭ, što viedaje Abramuka.
Dźmitryj Abramuk. Fota ź jahonaj staronki ŭ fejsbuku
Uvohule ŭ miescach pazbaŭleńnia voli jon prajaviŭ siabie ź vielmi drennaha boku. Chaj raskaža pra toje, što jon ź inšymi svaimi siabrami vytvaraŭ na chimii i padstaviŭ mianie asabista. Takich, jak jon, ja nie pavažaju».
Padčas nastupnaj kamunikacyi z žurnalistam «Našaj Nivy» Abramuk pačaŭ admaŭlać, što hrošy prychodzili jamu na rachunak — maŭlaŭ, takoha jon uvohule nikoli nie kazaŭ.
«Dy i ŭvohule, toje, što mnie na rachunak pryjšli niejkija hrošy — heta tolki maja sprava ŭvohule i nikoha nie pavinna [turbavać]», — padsumavaŭ Dźmitryj.
Paśla hetaha vydaliŭ pierapisku i pryhraziŭ, što kali jahonyja kamientary buduć apublikavanyja i žurnalist «napiša niešta ad jahonaha imia, to ŭsio žyćcio budzie škadavać».
Na nastupny dzień my znoŭ sazvanilisia ź Dźmitryjem. Ciapier jon skazaŭ, što nie atrymlivaŭ nijakich hrošaj dla Siarhieja Naliŭki, a ŭsiu dapamohu, jakuju atrymlivaŭ dla inšych — pieradavaŭ. Adkul tady Siarhiej uziaŭ jahony polski rachunak? «Ciažka skazać».
Dźmitryj dadaŭ, što «takich, jak Naliŭka, jon nie ličyć palitviaźniami» i pryznaŭ, što siońnia jamu składana farmulavać dumki.
Kamientar «Bajsoła»
«U našaj praktycy było tolki dva takija vypadki, tak što takoje zdarajecca niačasta. Ale kali ludzi dajuć nam čužyja rekvizity, to my papiaredžvajem, što nie možam kantralavać toje, kudy dalej pojduć hrošy», — kažuć u fondzie.
U fondzie kažuć, što adzinaje, što jany mohuć paraić — nie pieravodzić hrošy na rachunki ludziam, u jakich vy nie ŭpeŭnienyja. I nie daviarać ludziam prosta tamu, što vy siadzieli razam ź imi z kratami ci prajšli inšyja ciažkaści.