Krainy Bałtyi ŭ subotu adklučajucca ad enierhasistemaŭ Rasii i Biełarusi. Što treba viedać?
8 lutaha Estonija, Łatvija i Litva płanujuć sinchronna adklučycca ad rasijska-biełaruskaj enierhasistemy, viadomaj jak «elektryčnaje kołca BREŁŁ», i pieraklučycca na jeŭrapiejskuju sistemu ENTSO-E, piša Bi-bi-si.
Ilustracyjnaje fota
Heta histaryčny momant: u Vilni navat ustalavali simvaličny hadzińnik, jaki adličvaŭ dni da adklučeńnia, a ministr enierhietyki Litvy Žyhimantas Vajčunas nazvaŭ hety krok «apošnim etapam baraćby za enierhietyčnuju niezaležnaść».
«My pazbavim Rasiju mahčymaści vykarystoŭvać elektraenierhietyku jak instrumient hieapalityčnaha šantažu», — zajaviŭ Vajčunas.
Adzinuju enierhasistemu praściej padtrymlivać u stabilnym stanie, bo elektraenierhija pieraraźmiarkoŭvajecca ŭ zaležnaści ad popytu. Čym bolšaja enierhasistema, tym praściej kampiensavać nahruzku, asabliva ŭ pikavyja hadziny spažyvańnia.
Choć krainy Bałtyi jašče z 2022 hoda nie zakuplajuć elektraenierhiju ŭ Rasii i Biełarusi, jany da hetaha času atrymlivali bałansujučuju elektraenierhiju.
BREŁŁ patrabuje ad usich udzielnikaŭ padtrymańnia adnoj častaty, jakuju vyznačaje Rasija. U vypadku prablem na rasijskich elektrastancyjach paciarpieli b i bałtyjskija spažyŭcy.
Padrychtoŭka išła jašče z 2009 hoda, a paśla ŭvarvańnia Rasii va Ukrainu praces paskoryŭsia.
7 lutaha zakančvajecca dziejnaje pahadnieńnie BREŁŁ, i jaho vyrašyli nie praciahvać.
Luty vybrany tamu, što ŭ hety čas vypracoŭvajecca najbolšaja kolkaść elektraenierhii, mienš vierahodnyja ekstremalnyja ŭmovy nadvorja i nie pravodziacca ramontnyja raboty.
Z 21 linii elektrazłučeńnia z Rasijaj značnaja častka ŭžo adklučana, 8 lutaha adklučać astatnija.
Kala sutak enierhasistema Estonii, Łatvii i Litvy budzie pracavać u izalavanym režymie, kab prateściravać aŭtanomnaść i madelavać mahčymyja prablemy.
Uviečary 9 lutaha Bałtyja aficyjna dałučycca da ENTSO-E praz pavietranuju liniju Polšča — Litva.
Padrychtoŭka da adklučeńnia viałasia doŭha i hruntoŭna — miarkujecca, što spažyŭcy ničoha nie zaŭvažać. Kali i buduć pieraboi, to nie macniejšyja, čym padčas mocnaha vietru ci bury.
Ministerstva klimatu i enierhietyki Łatvii raić zaradzić telefony i vyklučyć z razietak niepatrebnyja prybory, asabliva ŭ pamiaškańniach, dzie ludzi znachodziacca redka (naprykład, na leciščy).
Estonskija vyratavalniki rajać mieć zapasnyja krynicy śviatła i vady, a taksama nastolnyja hulni dla zabavy.
Adnak śpiecyjalisty zapeŭnivajuć, što admysłova vyklučać prybory niama nieabchodnaści.
«Nijakaj niebiaśpieki, što niešta vyjdzie sa stroju ŭ vyniku adklučeńnia, niama. Tamu možna śmieła trymać usie prybory ŭ sietcy», — zajaviŭ pradstaŭnik estonskaha ratavalnaha departamienta Erki Pyld.