Jak skłaŭsia los dziaŭčyny, jakaja ŭ 2020-m zaprasiła Łukašenku na taniec?

24-hadovuju Volhu Piatrovič možna było čakać, naprykład, u słužbie pratakołu ci ŭ Nacyjanalnaj škole pryhažości, ale jaje karjera pakul bolš ścipłaja.

Piatrovič valsiruje z Łukašenkam na bali ŭ 2020-m. Skrynšot videa «Puł pieršaha»

Volha rodam z Barysava. U 2020-m jana była studentkaj 3-ha kursa Biełaruskaha dziaržaŭnaha technałahičnaha ŭniviersiteta, vučyłasia na biudžecie na inžyniera lasnoj haspadarki. Aktyŭna ŭdzielničała ŭ žyćci ŭniviersiteta, trapiła na konkurs «Mis Biełaruś» — a tamu i była zaprošana na bal da Łukašenki.

«Heta było niezabyŭna. Nie ŭsim vypadaje takaja mahčymaść, — kazała dziaŭčyna pra bal. — Atmaśfieru nie pieradać, usio nastolki ŭračysta. (…)

Ja sama zaprasiła Łukašenku na taniec. Jon nie admoviŭ — tančyć dobra. Tančyli vals, havaryli pra bal, jakaja ŭračystaja abstanoŭka, jakija tancory i jak jany vydatna vyhladajuć i starajucca».

U 2022-m dziaŭčyna skončyła ŭniviersitet.

Było b čakana pabačyć 24-hadovuju Volhu, naprykład, u słužbie pratakołu ci ŭ Nacyjanalnaj škole pryhažości, ale jaje karjera pakul bolš ścipłaja. Jana pracuje inžynieram pa lesaadnaŭleńni i mielijaracyi Barysaŭskaha vopytnaha lashasa.

Zavočna dziaŭčyna skančvaje mahistraturu. I milhaje na roznych rajonnych mierapryjemstvach.

Volha Piatrovič. Fota: sacsietki

Volha Piatrovič. Fota: sacsietki

Paralelna Volha ŭdzielničała ŭ konkursach pryhažości. Trapiła ŭ top-10 na «Mis Biełaruś 2021». Atrymała tytuły «Mis Barysaŭ» i «Mis Minščyna» ŭ 2023 hodzie. Ale ŭ madelny biznes nie źbirajecca.

«Mianiać spravu na podyum nie płanuju», — kazała jana dziaržaŭnaj haziecie.

Na konkursie «Mis Minščyna» ŭ 2023 hodzie. Fota: peramoga.by

U 2020 hodzie Volha Piatrovič sa svajoj palityčnaj pazicyjaj jašče nie vyznačyłasia. Jana tady kazała:

«Ja sioleta nie hałasavała. Vyrašyła zastacca ŭ baku ad hetaha pytańnia. Pra padziei ŭ krainie — ja zachoŭvaju niejtralitet. Kožny bok pa-svojmu maje racyju — i nie maje adnačasova. Tamu ja kankretnaj pazicyi nie zajmaju».

Fota: sacsietki

Sioleta Volha na vybarach była — hałasavała ŭ asnoŭny dzień. U padarunak atrymała siertyfikat na naviedvańnie Barysaŭskaha abjadnanaha muzieja.

Volha Piatrovič na vybarach-2025. Fota: «Minskaja praŭda»

«Ja liču siabie ščaślivym čałaviekam. U mianie jość lubimaja praca, siamja, u krainie mir i spakoj, moładzi adkryty ŭsie dźviery», — padzialiłasia jana ź dziaržaŭnaj presaj na ŭčastku.

Kamientary da artykuła