Novy suśvietny rekord: 59-hadovy niemiec pražyŭ u padvodnaj izalacyi 120 dzion

Voś u jakich umovach jon žyŭ i jak kamientuje svoj dośvied.

59-hadovy aerakaśmičny inžynier Rudyhier Koch vyłazić z vady praz 120 dzion izalacyi i atrymlivaje paśviedčańnie pra novy suśvietny rekord. Foty: X / Channel 8 English

Niamiecki aerakaśmičny inžynier Rudyhier Koch z Hiermanii pastaviŭ novy suśvietny rekord pa samym doŭhim znachodžańni ŭ pamiaškańni pad vadoj, piša vydańnie The Guardian.

59-hadovy mužčyna 120 dzion pražyŭ u śpiecyjalnaj padvodnaj kapsule kala ŭźbiarežža Puerta-Linda ŭ Panamie. U jahonym śpiecyjalnym pamiaškańni płoščaj 30 kvadratnych mietraŭ byŭ tualet, televizar, kampjutar i viełatrenažor. Elektryčnaść zabiaśpiečvali soniečnyja paneli na sušy. Taksama ŭ Kocha byŭ dostup u internet, za jahonaj aktyŭnaściu sačyli čatyry kamiery, a ježu i leki dastaŭlali kalehi.

Sam padvodny modul funkcyjanavaŭ jak štučny ryf i nie škodziŭ miascovaj faŭnie.

Rudyhier Koch padčas znachodžańnia ŭ padvodnym moduli

24 studzienia, paśla skančeńnia ekśpierymientu, Rudyhier Koch vyjšaŭ na pavierchniu i zaśviedčyŭ svaje dasiahnieńnie ŭ prysutnaści sudździ Knihi rekordaŭ Hinesa. 

«Heta była vialikaja pryhoda, i ciapier, kali jana skončyłasia, u mianie ŭźnikaje pačućcio škadavańnia. Mnie vielmi spadabałasia majo znachodžańnie tut. Hety dośvied niemahčyma apisać, vy pavinny vyprabavać heta sami», — zajaviŭ Koch paśla viartańnia na pavierchniu.

Jašče padčas ekśpierymientu mužčyna pryznavaŭsia, što mocna sumavaŭ pa znosinach ź blizkimi, ale ŭ toj ža čas adčuvaŭ siabie kamfortna ŭ cišyni.

Pierad Kocham daŭžej za ŭsich u padvodnaj izalacyi pražyŭ amierykaniec Džozef Dziciury, jaki pravioŭ 100 dzion u padvodnym domiku ŭ Fłarydzie.

Kamientary da artykuła