U Rasii zaklikali rasśledavać duel Lermantava
U sacsietkach žartujuć, što znojduć ukrainski śled.
Deputat Dziarždumy, narodny artyst Rasii Mikałaj Burlajeŭ paprasiŭ Śledčy kamitet rasśledavać śmierć paeta Michaiła Lermantava, jaki zahinuŭ na dueli ŭ 1841 hodzie, piša Radyjo Svaboda.
Deputat ličyć, što śledstva paśla dueli było praviedziena niadobrasumlenna: naprykład, jon piša, što kula trapiła ŭ cieła «pa nievierahodnaj dla roŭnaj pavierchni trajektoryi — źnizu ŭvierch, pad vuhłom amal u 40 hradusaŭ». «Pierakanaŭča prašu vas ab praviadzieńni sučasnaha, sumlennaha, niepraduziataha rasśledavańnia z vykarystańniem sučasnych technałohij, najaŭnych u rasparadžeńni Śledčaha kamiteta Rasii», — havorycca ŭ jaho zvarocie.
U sacsietkach nad inicyjatyvaj Burlajeva adnadušna paciašajucca i pamiarkoŭnyja, i patryjatyčnyja, i libieralnyja aŭtary. Mnohija sprabujuć ujavić sabie, jak mahło b vyhladać takoje «rasśledavańnie», i prapanujuć Śledčamu kamitetu inšyja vostra aktualnyja spravy.
«Absurdnyja historyi ad deputataŭ dapoŭnilisia prapanovaj rasśledavać hibiel Michaiła Lermantava. Nu, heta značyć, usio pa-darosłamu: adkryć kryminalnuju spravu, pravieści śledča-apieratyŭnyja mierapryjemstvy, ekśpiertyzy i ŭsie spravy. Vyklučna tamu, što deputatu zdałosia niešta niezrazumiełym i dziŭnym u aficyjnaj viersii hibieli. Nie pad tym vuhłom kula trapiła.
Vierahodna, snajpier śpiecnaza HUR siadzieŭ niepadalok i pazbaviŭ Rasiju jaje zdabytku.
Dobra być deputatam u Rasii. Karyści ad ciabie prykładna nul, sumna, voś ty i fantanuješ roznaha rodu prapanovami. Zarobak, znoŭ ža. Dziaržzabieśpiačeńnie. Abiedy ŭ stałovaj za śmiešnyja hrošy. Čaho nie deputactvavać», — napisaŭ Anatol Nieśmijan.