Žycharoŭ Homielščyny zaklikali čaściej myć ruki — pryčyna ŭ niebiaśpiečnaj chvarobie
U pačatku 2025 hoda ŭ Chojnikach zarehistravali vypadak niebiaśpiečnaha zachvorvańnia — hiemarahičnaj lichamanki z nyračnym sindromam (HŁNS). Pra heta paviedamili ŭ sanitarna-epidemijałahičnaj słužbie Homielskaj vobłaści.
U pačatku vosieni tut ža byli vyjaŭleny jašče try vypadki «myšynaj» lichamanki. U suviazi z hetym daktary apublikavali važnuju infarmacyju pra toje, jak zaścierahčysia ad hetaj chvaroby, piša Tochka.by.
Čym niebiaśpiečnaja hiemarahičnaja lichamanka?
Hiemarahičnaja lichamanka z nyračnym sindromam — heta vostraje infiekcyjnaje zachvorvańnie. Jano adnosicca da hrupy asabliva niebiaśpiečnych pryrodna-asiarodkavych infiekcyj, jakija časam uźnikajuć u lasach, lasastepu.
Čaściej za ŭsio asiarodki hetaj infiekcyi sustrakajucca ŭ Japonii, Turcyi, na Blizkim Uschodzie, u niekatorych krainach Jeŭropy (Finlandyja, Francyja, Hiermanija, Šviecyja).
Asnoŭnyja pieranosčyki virusu — myšapadobnyja hryzuny. U ich chvaroba praciakaje bieź jakich-niebudź simptomaŭ. Ale hetyja žyvioły raspaŭsiudžvajuć virus praź ślinu, maču i kał, zaražajučy lasnuju padściłku, vadu i pradukty charčavańnia.
Dla čałavieka heta vielmi niebiaśpiečnaja infiekcyja. Joj možna zarazicca pry ŭdychańni pyłu, padčas naviedvańnia lesu, zboru hryboŭ i jahad, na pryrodzie i pry rabotach na prysiadzibnym učastku.
Simptomy i prafiłaktyka
Siarod asnoŭnych simptomaŭ «myšynaj» lichamanki — ahulnaja intaksikacyja i paražeńnie nyrak. Inkubacyjny pieryjad moža składać ad 7 da 25 dzion.
Zatym u čałavieka adznačajecca chutkaje pavyšeńnie tempieratury, rezkija hałaŭnyja i ciahlicavyja boli, pačyrvanieńnie tvaru, šyi i vierchniaj častki tułava.
Mahčymyja skarhi na boli ŭ žyvacie i pajaśnicy. Časta takuju chvarobu pamyłkova prymajuć za hryp.
Pavodle danych Homielskaha centra hihijeny, epidemijałohii i hramadskaha zdaroŭja, u vobłaści štohod rehistrujecca ad 15 da 35 vypadkaŭ HŁNS. Rost zachvorvańnia zvyčajna prypadaje na leta-vosień.
Siarod prafiłaktyčnych mier vyłučajucca:
- paźbiahańnie kantaktaŭ z hryzunami, abarona praduktaŭ charčavańnia i vady, asabliva ŭ padvałach;
- vykanańnie asabistaj hihijeny;
- užyvańnie tolki termična apracavanych praduktaŭ;
- nie jeści i nie kuryć biez myćcia ruk.
Taksama važna ŭtrymlivać terytoryju pry domie ŭ paradku, pazbaŭlacca ad śmiećcia i suchastoju.