Maładuju supracoŭnicu «Pielenha» aryštavali za «zakliki da naniasieńnia škody Biełarusi». Joj pahražaje da 12 hadoŭ
29-hadovuju Karynu Prataščyk čakaje małoje dzicia. Zatrymać dziaŭčynu mahli padčas letašniaj abłavy KDB na pradpryjemstvie.
Karyna Prataščyk. Fota ź jaje staronki Ukantakcie (archiŭnaja kopija)
Karynie Prataščyk 29 hadoŭ. Jana rodam ź Minska. Karyna vielmi tvorčy čałaviek — lubić padarožničać, fatahrafavać i rabić roznyja rečy rukami. A piać hadoŭ tamu stvaryła ŭłasnyja raźvivajučyja kartki dla dziaciej.
Miarkujučy pa sacsietkach, u dziaŭčyny jość muž i niepaŭnaletniaje dzicia.
Viasielnaje fota Karyny. Uziataje ź jaje staronki Ukantakcie (archiŭnaja kopija)
Pa źviestkach «Biełpoła», z 2017 hoda Prataščyk pracavała na «Pielenhu». Apošnim časam — kantraloram aptyčnych detalaŭ i pryboraŭ 5 razradu ŭ biuro techničnaha kantrolu aptyčnaj i kaśmičnaj vytvorčaści. Jana zajmałasia pravierkaj jakaści aptyčnych vyrabaŭ.
Nieviadoma napeŭna, kali jaje zatrymali — apošniaja aktyŭnaść Karyny, jakuju my adšukali, adbyvałasia bolš za 7 miesiacaŭ tamu. Prykładna ŭ toj ža čas, u lipieni 2024 hoda, adbyvałasia abłava na supracoŭnikaŭ «Pielenha».
Źviazanaja jana była z vialikim rasśledavańniem «Biełpoła», jakoje hruntavałasia na źlitych z pradpryjemstva dakumientach. Supracoŭnikaŭ «Pielenha» vadzili na palihraf, a niekatorych — zvolnili. Pra kryminalnyja spravy pa vynikach abłavy dahetul nie było viadoma.
Sud nad dziaŭčynaj pačynajecca 3 lutaha 2025 hoda ŭ Minskim haradskim sudzie. Karynu abvinavačvajuć u «zaklikach da dziejańniaŭ, jakija nanosiać škodu Biełarusi» (č. 3 art. 361 KK). Joj pahražaje ad čatyroch da dvanaccaci hadoŭ kałonii.
{DONATE_PAYPAL}