Frydrych Mierc: My zmušajem Ukrainu vajavać sa źviazanaj rukoj

Lidar Chryścijanska-demakratyčnaha sajuza Hiermanii (CHDS) Frydrych Mierc, jaki paśla chutkich parłamienckich vybaraŭ moža zaniać pasadu hiermanskaha kanclera, padčas vizitu ŭ Kijeŭ padvierhnuŭ ciapierašniaha kiraŭnika niamieckaha ŭrada Ołafa Šolca krytycy za niežadańnie śledam za ZŠA, Vialikabrytanijaj i Francyjaj pieradać Ukrainie dalnabojnuju zbroju.

Uładzimir Zialenski z Frydrycham Miercam. Fota: AP Photo/Efrem Lukatsky

«My chočam, kab vaša armija była zdolnaja nanosić udary pa vajskovych bazach u Rasii. Nie pa cyvilnamu nasielnictvu, nie pa infrastruktury, a pa vajskovych abjektach, ź jakich atakujuć vašu krainu», — skazaŭ Mierc prezidentu Ukrainy Uładzimiru Zialenskamu.

Pierad hetym Šolc admoviŭ Zialenskamu ŭ prośbie pieradać Ukrainie niamieckija kryłatyja rakiety «Taŭrus», vykarystańnie jakich, pavodle jahonych słoŭ, pryviadzie da nieprymalnaj ryzyki eskałacyi i moža być interpretavana jak ustupleńnie Hiermanii ŭ vajnu.

«Z takimi abmiežavańniami pa dalokaści my zmušajem vašu krainu vajavać (va ŭmovach), kali adna ruka ŭ jaje źviazanaja za śpinaj», — skazaŭ Mierc.

Na hety momant Hiermanija zajmaje druhoje paśla ZŠA miesca pa abjomie finansavaj i vajskovaj dapamohi Ukrainie i prymaje bolš ukrainskich vajennych biežancaŭ (bolš za miljon), čym lubaja inšaja kraina.

Błok CHDS/CHSS na čale z Frydrycham Miercam maje šaniec zrušyć sacyjał-demakrata Šolca na vybarach, jakija projduć u Hiermanii 23 lutaha. CHDS/CHSS u bolšaści apytańniaŭ maje nad sacyjał-demakratami pieravahu bolš čym u 10 pracentnych punktaŭ.

Kamientary da artykuła