Biełaruski instytut publičnaj historyi viarnuŭ jašče adno imia achviary kamunistyčnaha teroru

Na sajcie ay.by daśledčyki z niezaležnaj instytucyi znajšli pratakoł pieratrusu ŭ Aŭsiejčyka Vasila Ivanaviča.

Pratakoł pieratrusu ŭ Vasila Ivanaviča Aŭsiejčyka 

«Pieratrus adbyvaŭsia 10 vieraśnia 1937 hoda, u Miensku na vulicy Fabryčna-Zavodskaja, 28. Jaho pravodziŭ supracoŭnik NKVD BSSR Nikicienka. U jakaści paniatych prysutničali Sochar P. i Babčonak Kanstancin Alaksiejevič.

U adkrytych bazach achviaraŭ palityčnych represijaŭ Aŭsiejčyka nie adšukali. Jahonaje imia moža być u bazie nieabhruntavana represavanych u Nacyjanalnym archivie Respubliki Biełaruś (naličvaje 180 tysiač proźviščaŭ). Ale z 2018 hoda NARB pazapraŭna schavaŭ jaje ad hramadzianaŭ.

Dziakujučy inšym krynicam udałosia ŭstanavić los hetaha čałavieka», — napisali biełaruskija daśledčyki.

Vasil Aŭsiejčyk naradziŭsia ŭ 1894 hodzie ŭ vioscy Rožki, ciapier Hrodzienskaja vobłaść. Jaho aryštavali 10 vieraśnia 1937 hoda ŭ miežach tak zvanaj «Polskaj apieracyi». 6 śniežnia 1937 h. Kamisija NKVD i Prakuratury SSSR u składzie narkoma Mikałaja Jažova i prakurora Andreja Vyšynskaha asudziła Vasila Aŭsiejčyka pa artykule 68 Kryminalnaha kodeksa BSSR (špijanaž) da rasstrełu (pratakoł № 478). Pryhavor vykanany 29 śniežnia 1937 hoda, vierahodna, u Miensku.

Paśla ŭkaza Prezidyuma Viarchoŭnaha savieta SSSR ad 16 studzienia 1989 hoda sprava Aŭsiejčyka była spynienaja praz adsutnaść składu złačynstva.

Ciapier imia Vasila Aŭsiejčyka dadadziena ŭ bazy achviaraŭ stalinskaha teroru.

Kamientary da artykuła